Ուկրաինայի նախագահ Վլադիմիր Զելենսկին հայտնել է, որ դիմել է «Բուխարեստի իննյակին» և ռազմական օգնություն խնդրել, նաև կոչ է արել պատժամիջոցներ կիրառել Ռուսաստանի դեմ։ Այսօր առավոտյան ուկրաինացիներին ուղղված իր տեսաուղերձում Զելենսկին նշել է, որ Ուկրաինային անհրաժեշտ է հակապատերազմական կոալիցիա ստեղծել։
«Բուխարեստի իննյակը» Կենտրոնական և Արևելյան Եվրոպայի 9 երկրների ասոցիացիա է, որը ստեղծվել է ՆԱՏՕ-ի արևելյան թևի երկրների միջև ռազմական համագործակցությունը խորացնելու համար: Ասոցիացիայի կազմում ընդգրկված են Բուլղարիան, Հունգարիան, Էստոնիան, Լիտվան, Լատվիան, Լեհաստանը, Ռումինիան, Սլովակիան և Չեխիան:
Զելենսկին կարծում է, որ միայն ուկրաինացիների վճռականությունն է ի վիճակի «պահպանել Ուկրաինայի ազատությունը և պաշտպանել պետությունը»։Ուկրաինայի նախագահը քաղաքացիներին հորդորել է ցուցաբերել առավելագույն զսպվածություն և փոխադարձ աջակցություն։
«Հոգ տարեք ձեր սիրելիների մասին, բայց մի մոռացեք նաև ձեր շրջապատի մարդկանց` հատկապես միայնակներին, տարեցներին: Օգնեք մթերային ապրանքների հարցում, օգնեք ապաստան գտնել, երբ կա օդային հարձակման տագնապի ազդանշան, օգնեք ստանալ ստուգված, պաշտոնական տեղեկատվություն»,- ասել է նա։
Զելենսկին միաժամանակ կարծում է, որ Ռուսաստանը վաղ թե ուշ պետք է Ուկրաինայի հետ խոսի ռազմական գործողությունների դադարեցման մասին, և «լավ կլինի դա շուտ անել»։
«Ռուսաստանը վաղ թե ուշ ստիպված կլինի խոսել մեզ հետ, խոսել այն մասին` ինչպես դադարեցնել ռազմական գործողությունները և դադարեցնել այս ներխուժումը: Որքան շուտ սկսվի խոսակցությունը, այնքան քիչ կլինեն Ռուսաստանի սեփական կորուստները», – ասել է նախագահը:
Զելենսկին կրկին դիմել է ռուսներին՝ կոչ անելով միանալ հակապատերազմական ցույցերին։
Հիշեցնենք` փետրվարի 24-ի վաղ առավոտյան Ռուսաստանի նախագահ Վլադիմիր Պուտինը հայտարարեց, որ որոշում է կայացրել Ուկրաինայի նկատմամբ հատուկ ռազմական գործողության մասին, քանի որ ԼԺՀ-ի և ԴԺՀ-ն դիմել են օգնության խնդրանքով։
