Աշխատանքային այցով Նուր-Սուլթանում գտնվող վարչապետ Նիկոլ Փաշինյանը հանդիպել է Ղազախստանի նախագահ Կասիմ-Ժոմարտ Տոկաևի հետ։ Այս մասին հայտնում են կառավարության մամուլի ծառայությունից:Ղազախստանի նախագահն ասել է, որ ղազախ ժողովուրդը Հայաստանի և հայ ժողովրդի նկատմամբ տածում է ամենաջերմ զգացմունքները։
«Ես անձամբ Ձեզ և հայ ժողովրդին մեծ հարգանքով եմ վերաբերվում: Կարծում եմ` վատ չեմ տիրապետում Ձեր ժողովրդի պատմությանը, բարձր եմ գնահատում մշակույթի և մյուս ոլորտներում ձեռքբերումները»,– ասել է Տոկաևը:
Ղազախստանի նախագահն ընդգծել է, որ Հայաստանն ու Ղազախստանը դաշնակիցներ են Հավաքական անվտանգության պայմանագրի կազմակերպությունում (ՀԱՊԿ), Եվրասիական տնտեսական միությունում (ԵԱՏՄ)։Իր հերթին, վարչապետ Փաշինյանն ուրախությամբ նկատել է, որ հունվարին տեղի ունեցած իրադարձություններից հետո Ղազախստանում բնականոն կյանքը լիարժեք վերականգնվել է:
«Ցանկանում եմ ընդգծել, որ ուրախ եմ, որ վերջապես ՀԱՊԿ ճգնաժամային մեխանիզմներն աշխատեցին: Գիտեք, որ դա եղել է Հայաստանի Հանրապետության նախագահության առաջնահերթությունը: Մենք միշտ կարծել ենք և կարծում ենք, որ ՀԱՊԿ ճգնաժամային արագ արձագանքման մեխանիզմները պետք է նորմալ աշխատեն: Ցավոք Հայաստանը եղել է մի իրավիճակում, երբ մենք կարծում էինք, որ մեխանզիմը պետք է գործի, սակայն դա տեղի չունեցավ»,– ասել է Փաշինյանը։
Նա հիշեցրել է, որ ՀԱՊԿ-ում նախագահությունը ստանձնելուց հետո Հայաստանն այդ մեխանիզմի գործարկումը հայտարարել է իր առաջնահերթություններից մեկը։«Շատ ուրախ եմ, որ երբ անհրաժեշտ եղավ, այդ մեխանիզմը կարողացանք գործարկել»,–ասել է Փաշինյանը։
Հանդիպման ընթացքում երկու երկրների ղեկավարները քննարկել են նաև հայ-ղազախական հարաբերությունների օրակարգային տարբեր հարցեր, անդրադարձել ինտեգրացիոն գործընթացներին առնչվող մի շարք թեմաների:
