ԵՄ արտաքին գործերի խորհուրդն ընդունել է պատժամիջոցների երկրորդ փուլը՝ Ռուսաստանի նախագահ Վլադիմիր Պուտինի և ԱԳ նախարար Սերգեյ Լավրովի ակտիվները սառեցնելու համար։ Այս մասին Twitter-ի իր էջում գրել է Լատվիայի արտգործնախարար Էդգար Ռինկևիչը։
Եվրամիությունն ավելի վաղ հաստատել էր Ռուսաստանի դեմ պատժամիջոցների նոր փաթեթը՝ Ուկրաինա ներխուժելու համար։ Դրանք կազդեն Ռուսաստանի բանկային հատվածի և խոշոր պետական ընկերությունների 70%-ի վրա, ներառյալ ռազմական արդյունաբերությունը: ԵՄ-ն նախատեսում է նաեւ արգելել նավթի արտահանումը եւ «անհնարին դարձնել Ռուսաստանի համար իր նավթավերամշակման գործարանների բարելավումը»:
Բացի այդ, ԵՄ-ն կարգելի ռուսական ավիաընկերություններին ինքնաթիռների ու ավիացիոն սարքավորումների վաճառքը։ Պատժամիջոցների փաթեթը նախատեսում է նաև Ռուսաստանին կիսահաղորդիչների և ծրագրային ապահովման վաճառքի սահմանափակում։ Ռուսաստանից ժամանած դիվանագետներն ու գործարարներն այլևս չեն կարողանա առաջնահերթության կարգով ստանալ ԵՄ վիզա։
Ավելի վաղ Միացյալ Թագավորությունը, ԱՄՆ-ը, Կանադան, Ճապոնիան հայտարարել էին Ռուսաստանի դեմ պատժամիջոցների նոր փաթեթի մասին, իսկ Չեխիան, Լատվիան և Լիտվան դադարեցրել էին ռուսներին վիզաների տրամադրումը։
