ՌԴ Անվտանգության խորհրդի փոխնախագահ Դմիտրի Մեդվեդևը հայտարարել է, որ հնարավոր է՝ վերջնական վերանայվեն հարաբերություններն այն երկրների հետ, որոնք պատժամիջոցներ են սահմանել ՌԴ-ի դեմ: Համապատասխան գրառումը նա կատարել է «Вконтакте» սոցիալական ցանցի իր էջում։
«Լավ նորություններ էլ կան։ Պատժամիջոցները կարող են հիանալի առիթ դառնալ՝ վերջնականապես վերանայելու համար հարաբերություններն այն երկրների հետ, որոնք սահմանել են դրանք, այդ թվում՝ ռազմավարական կայունության շուրջ երկխոսությունը դադարեցնելու համար»,-գրել է Մեդվեդևը։
Բացի այդ, ՌԴ Անվտանգության խորհրդի փոխնախագահը իշխանության, կառավարչական էլիտաների և քաղաքացիների կոնսոլիդացիա է կանխատեսում պատժամիջոցների պատճառով, և նախազգուշացնում է Արևմուտքին․ «Սպասեք»։Նա նաև չի բացառել ռազմավարական կայունության շուրջ երկխոսության ընդհատման, «ամեն ինչից, այդ թվում՝ СНВ-3 պայմանագրից» հրաժարվելու հնարավորությունը:
«Չէ՞ որ սկզբունքորեն կարելի է հրաժարվել ամեն ինչ, ներառյալ СНВ-3 պայմանագիրը, որը ես կնքել էի Բ․Օբամայի հետ և Վ․Վ․Պուտինը երկարաձգել էր ԱՄՆ-ի գործող ղեկավարի հետ։ Մեր ինչի՞ն է այն պետք հիմա, այսպիսի պայմաններում, առավել ևս, որ ստորագրված է պատժամիջոցների տակ գտնվող անձանց կողմից»,-գրել է Մեդվեդևը։
ՌԴ Անվտանգության խորհրդի փոխնախագահը հավելել է` ժամանակն է դեսպանատները փակել ամբային կողպեքներով, իսկ շփումները շարունակել՝ միմյանց նայելով ոչ այլ կերպ, քան հեռադիտակների և զենքի օպտիկայի միջոցով:Նշենք` այսօր Եվրամիությունը Դմիտրի Մեդվեդևին, Միխայիլ Միշուստինին, Վլադիմիր Կոլոկոլցևին և Սերգեյ Իվանովին ներառել է պատժամիջոցների ցուցակում: Այս մասին ասված Է Եվրամիության պաշտոնական ամսագրում հրապարակված փաստաթղթում։ Ինչպես ավելի վաղ հայտարարել Էր Եվրամիության դիվանագիտության ղեկավար Ժոզեպ Բորելը, ԵՄ-ի սահմանափակումները կլինեն նույնը, ինչ ցուցակում գտնվող մյուս ֆիզիկական անձանց դեպքում. դրանք վերաբերում են ակտիվների սառեցմանը:
Հիշեցնենք` փետրվարի 24-ի վաղ առավոտյան Ռուսաստանի նախագահ Վլադիմիր Պուտինը հայտարարեց, որ որոշում է կայացրել Ուկրաինայի նկատմամբ հատուկ ռազմական գործողության մասին, քանի որ ԼԺՀ-ի և ԴԺՀ-ն դիմել են օգնության խնդրանքով։
