Սումգայիթյան ոճրագործության 34–րդ տարելիցի կապակցությամբ Արցախի ԱԺ նախագահ Արթուր Թովմասյանը հանդես է եկել ուղերձով` նշելով, որ ցեղասպանությունից տառապել և տառապում են աշխարհի շատ ժողովուրդներ, ազգեր ու ազգություններ, իսկ հայ ժողովրդի համար այն անցյալն է ու ներկան, բայց ոչ երբեք ապագան։ Այս մասին տեղեկանում ենք ԱՀ ԱԺ կայքից։
«20-րդ դարասկզբին ծնունդ առած արհեստածին պետություն Ադրբեջանն իր կազմավորման ժամանակներից ի վեր ստանձնել է հայատյաց առաքելություն։ Ապացույցը 1988թ․-ին կազմակերպած սումգայիթյան ջարդերն ու պարբերաբար շարունակվող պատերազմներն են։ Ադրբեջանի միակ նպատակն ու հոգեգար ցանկությունն Արցախի վերջնական բռնազավթումն ու բնիկ ժողովրդի վերացումն է»,– նշել է Թովմասյանը։
Խորհրդարանի ղեկավարի խոսքով` անպատժելիությունն ու անհանդուրժողականությունը ադրբեջանական իշխանություններին 2020թ–ին մղեցին նոր ցեղասպան գործողությունների։
«Հայատյացության դրսևորումն իր գագաթնակետին հասավ 2020 թվականի սեպտեմբերին Ադրբեջանի սանձազերծած պատերազմով, մասնավորապես Արցախի բնակչության, հայ գերիների հանդեպ ցուցաբերած անմարդկային վերաբերմունքի, սպանությունների, խոշտանգումների, մշակութային ցեղասպանության ձևով»,– նշել է Թովմասյանը։
Խստորեն դատապարտելով Սումգայիթյան ոճրագործությունը և արցախահայության հանդեպ իրականացվող շարունակական քաղաքականությունը՝ Արցախի խորհրդարանի նախագահը քաղաքակիրթ աշխարհին կոչ է անում գործուն քայլեր ձեռնարկել հայերի հանդեպ ադրբեջանական ցեղասպան քաղաքականությունը կանխարգելու ուղղությամբ։
«Մենք պետք է դուրս գանք այս ծանր իրավիճակից և, մեր պապենական հողում ապրելով, պահանջատեր լինենք մեր իրավունքներին։ Խոնարհումս ադրբեջանական բռնություններին զոհ դարձած մեր հայրենակիցների և արցախյան բոլոր պատերազմներում նահատակված քաջորդիների հիշատակին»,– եզրափակել է Թովմասյանը։
Հիշեցնենք` 1988թ. փետրվարի 26-29–ը Բաքվից 20 կիլոմետր հեռավորության վրա գտնվող Սումգայիթ քաղաքում ադրբեջանական իշխանությունները սկսեցին տեղի հայ բնակչության բնաջնջումը, որն ուղեկցվեց զանգվածային թալանով և ոչնչացմամբ:Պաշտոնական տվյալներով՝ զոհվել է 26 հայ, ոչ պաշտոնական տվյալներով՝ զոհերի թիվը մի քանի հարյուր է։
