ԱՄՆ-ը փակում է իր օդային տարածքը ռուսաստանյան բոլոր ինքնաթիռների համար, հայտարարել է ԱՄՆ-ի նախագահ Ջո Բայդենը՝ երեքշաբթի օրը կոնգրեսում ելույթի ժամանակ։ Այս մասին հայտնում է ՌԻԱ Նովոստին։
«Այսօր ես հայտարարում եմ, որ մենք մեր դաշնակիցներից հետո, Ռուսաստանի էլ ավելի մեկուսացման համար փակում ենք ամերիկյան օդային տարածքը ռուսաստանյան բոլոր ավիաչվերթերի համար ու ավելացնում ենք ճնշումը տնտեսության վրա»,-ասել է նա։
«Մենք կշարունակենք պատժամիջոցներ կիրառել՝ ոչնչացնելու նրանց ֆինանսական համակարգը, որպեսզի թույլ չտանք Ռուսաստանի բանկերին մասնակցել ֆինանսական գործարքներին: Մենք փորձում ենք կտրել Ռուսաստանի հասանելիությունը տեխնոլոգիաներին, տնտեսական հզորությանը, որպեսզի նրանց զինված ուժերը թույլ լինեն որքան հնարավոր է»,- ասել է ԱՄՆ նախագահը։
Բայդենը նշել է, որ ռուս օլիգարխները «միլիոնավոր դոլարներ են կուտակել իրենց դաժան ռեժիմով» և նշել, որ ԱՄՆ արդարադատության նախարարությունը վերջ կդնի դրան։
ԱՄՆ-ի տրանսպորտի նախարարության հաղորդմամբ, ԱՄՆ-ի օդային տարածքն օգտագործելու արգելքը վերաբերում է Ռուսաստանի հետ կապված բոլոր ինքնաթիռներին, այդ թվում՝ չարտերային չվերթեր իրականացնող օդանավերին։
«Սա այլևս չի կրկնվի: Սա պետք է դադարեցվի: ԱՄՆ-ը, Արդարադատության նախարարությունը, մենք հստակ նպատակ ունենք հետապնդելու ռուս օլիգարխներին, որպեսզի խլենք նրանց զբոսանավերը, նրանց շքեղ բնակարանները, ունեցվածքը»,- շեշտել է ԱՄՆ նախագահը:
Հիշեցնենք, որ փետրվարի 28-ից Եվրամիությունն է արգելել ռուսական ինքնաթիռներին թռիչքներ իրականացնել իր տարածքով։Այդ պահանջը վերաբերում է բոլոր օդանավերին, որոնք շահագործվում են Ռուսաստանում գրանցված ռուսական ավիափոխադրողների կողմից։ Որոշումը վերաբերում է նաև այն ինքնաթիռներին, որոնք գրանցված չեն Ռուսաստանում, բայց որևէ կերպ վերահսկվում են ռուսական ֆիզիկական կամ իրավաբանական անձի կամ կազմակերպության կողմից:
