Ես հիմա պաշտոնապես «Հայաստան» և «Պատիվ ունեմ» խմբակցությունների պահանջում եմ, որ իրենք հրապարակային դիրքորոշում արտահայտեն. ի վերջո Սանասար է, թե Կուբաթլի և այդպես շարունակ: Այս մասին այսօր Ազգային ժողովում հարց ու պատասխանի ժամանակ ասաց ՀՀ վարչապետ Նիկոլ Փաշինյանը՝ պատասխանելով «Հայաստան» դաշինքից Հռիփասիմե Ստամբուլյանի հարցին:
«Եթե Սանասար է և ոչ թե Կուբաթլի, ձեր լիդերները ինչո՞ւ են քսան տարի բանակցել այդ տարածքները Ադրբեջանին հանձնելու վերաբերյալ, ընդ որում դա արել են հրապարակային, ձեր ընդունած Մադրիդյան սկզբունքներում գրվել է՝ յոթ շրջանները վերադարձվում են Ադրբեջանին, հիմա ասեք այ դավաճաններ ինչի եք գնացել հայրենիքը դրել սակարկությունների վրա, որ հացահատիկի գործ անե՞ք»,-ասաց նա և կրկին պահանջեց սիրքորոշում հայտնել:
«Հերիք է գաք այստեղ կոկորդիլոսի արցունքներ թափեք, կամ էլ էնա Սյունիքի մասին խոսողները, հենա տարան գլուխները կախ ընդունեցին իրենց մեղքը, ներում խնդրեցին, 15 միլիարդ էլ վճարեցին պետական բյուջե, այդ դո՞ւք եք խոսում Սյունիք մասին, այ թալանչիներ»,-ասաց նա:
Հռիփսիմե Ստամբուլյանը նշեց, որ իրավունք չունի մատ թափ տալով և բղավելով պատասխանել իրենց հարցերին, իսկ Նիկոլ Փաշինյանն ասաց.«Ես ձեզ պարզ հարց եմ տալիս, ով ինձ ասի որ ես հող եմ հանձնել, ես այդ մարդկանց հետ մատով եմ խոսելու, և մատով եմ խոսացել, տո ձեր ղեկավարության ժամանակ ի՞նչ է եղել, եթե Սանասար էր, ինչու եք գնացել հանձնել: Ձեր չափը իմացեք հերիք եղավ ու բոլ եղավ»:
