Էկոնոմիկայի նախարար Վահան Քերոբյանն այսօր ՀՀ կառավարության նիստում, առիթից օգտվելով, գյուղացիներին կոչ արեց հնարավորինս շատ հողատարածքներ մշակել` հաշվի առնելով աշխարհում տեղի ունեցող իրադարձությունների ֆոնին ՀՀ–ի պարենային անվտանգությանը սպառնացող մարտահրավերները։
«Մյուս կողմից մենք տեսնում ենք, որ սննդամթերքի գներն աճելու են, ու գյուղատնտեսությունը դառնալու է ավելի հրապուրիչ»,– ասաց Քերոբյանը։ՀՀ վարչապետ Նիկոլ Փաշինյանն ընդգծեց, որ պարարտանյութերի վաճառքի 50 տոկոսը սուբսիդավորելու մասին այսօր ընդունած որոշմամբ` կառավարությունն արձագանքում է շուկայում առկա գնաճին։
«Ինչպես տեսնում ենք վերջին 2 տարում գնաճային երկրաշարժեր են տեղի ունենում անընդհատ. առաջինը Covid-ն էր, երկրորդը` աշխարհաքաղաքական զարգացումները և Ուկրաինայում տեղի ունեցող իրադարձությունները։ Եվ, այս առումով, այո՛, լավատեսական ոչինչ առջևում չի սպասվում»,– ասաց վարչապետը։
Միակ լավատեսականը, ըստ Փաշինյանի, կարող է լինել ստեղծված իրավիճակում գյուղատնտեսության զարգացումը։ Իսկ դրա համար Փաշինյանը կարևորեց ոռոգման համակարգերի նորոգման, ջրի կորուստների նվազեցման անհրաժեշտությունը, հատկապես, որ այս տարի սպասվող երաշտը, նրա խոսքով, արդեն ակնհայտ է։
