ՀՀ երկաթուղու Երասխի և Մեղրիի հատվածների երկաթգծի վերականգնման աշխատանքների առաջին փուլի համար կառավարությունն այսօր որոշեց ՀՀ բյուջեով 12.9 մլն դրամ գումար հատկացնել։ՀՀ տարածքային կառավարման և ենթակառուցվածքների նախարար Գնել Սանոսյանը պազաբանեց, որ այդ գումարի շրջանակներում նախատեսվում է 43 կմ տարածքի գեոդեզիական հանութագրման աշխատանքներ իրականացնել, որոնց հիման վրա հետագայում կռավարությունն արդեն նախագծման աշխատանքները կպատվիրի։
«Կուսումնասիրվեն նշված հատվածում առկա 9 թունելները, 22 սրահները, ճանապարհների հատումները, 2 կամուրջները, ավտոմոբիլային ճանապարհները, ոռոգման խողովակաշարերն ու կայարանի շենք–շինությունները։ Մասնագիտական խումբ ենք գործուղում այնտեղ, որոնք ուսումնասիրություն կիրականացնեն»,– ասաց Սանոսյանը` հավելելով, որ խումբը բաղկացած է Ճարտարապետության ու շինարարության համալսարանի գիտնականներից, որոնց մասնագիտական փորձը բավարար է այդ աշխատանքների պատշաճ իրականցման համար։
Խմբի երկու անդամներն էլ Հարավկովկասյան երկաթուղու ներկայացուցիչներ են։
ՀՀ վարչապետ Նիկոլ Փաշինյանը հիշեցրեց, որ երկաթուղու այս հատվածը Երասխ-Ջուլֆա-Օրդուբադ-Մեղրի-Հորադիզ երկաթուղու հայաստանյան հատվածն է։
«Սա շատ կարևոր իրադարձություն է և կրկին ուզում եմ հույս հայտնել, որ մենք զուգահեռ դե յուրե կամրագրենք այն պայմանավորվածությունները, որ ձեռք են բերվել 2021թ–ի Սոչիի և Բրյուսելի եռակողմ հանդիպումների ընթացքում։ Բայց մինչ այդ աշխատանքը չի կանգնում։ Այսինքն` մենք զուգահեռ աշխատում ենք, որպեսզի նաև ժամանակը ռացիոնալ օգտագործենք»,– ասաց Փաշինյանը։
