«Սեյրան Օհանյանն ասում է, որ Կուբաթլու չէ, այլ Սանասար: Թերեւս բոլորի համար պարզ է, որ խոսքը նախօրեին ԱԺ-կառավարություն հարցուպատասխանի ժամանակ տեղի ունեցած միջադեպի «թեմայի մեջ է»:
Հայկական վերնախավը ավելի քան քառորդ դար մնաց այդ երկվության մեջ՝ ներսում «Սանասար», դրսում՝ «Կուբաթլու»: Ու ավելի քան քառորդ դար այդ երկվությունը դիտվել է իբրեւ հնարամիտ դիվանագիտություն եւ ռազմավարական խորաթափանցություն:
Դա այդպես կարող էր լինել, բայց դրա համար պետք էր մի ավելի պարզ բան. պետք էր, որ հայկական ռազմա-քաղաքական վերնախավի ներկայացուցիչների դղյակների առաջին հարկից վերեւ եղած բոլոր մնացյալ հարկերի բետոնը գնար Սանասար: Գնար այնպես, ինչպես օրինակ Ուկրաինայում է գնացել շփման գիծ այնպես, որ ռուսական բանակը ահռելի ծանր գնով է կարողանում հաղթահարել պաշտպանական այդ բնագծերը:
Այլապես, Սանասար ասվել ու գրվել է, ցավոք սրտի ընդամենը Երեւանում անձնական դղյակաշինությունը եւ հարստությունը լեգիտիմացնելու համար»,-գրել է քաղաքական մեկնաբան Հակոբ Բադալյանը։
