Ուկրաինան Ռուսաստանի Դաշնության հետ իր տարածքային ամբողջականության հարցերի շուրջ բանակցություններում չի զիջելու, այլ կքննարկի հումանիտար միջանցքների ստեղծումը, զինադադարը և իրավիճակին վերադարձը մինչև Ռուսաստանի հատուկ գործողության մեկնարկը։ Այս մասին, ըստ ՏԱՍՍ-ի, այսօր հայտարարել է Ուկրաինայի արտաքին գործերի նախարար Դմիտրի Կուլեբան։
«Մենք չենք զիջի մեզ համար կարևորագույնը Ուկրաինայի տարածքային ամբողջականությունը: Դա բացառվում է: Իհարկե, մենք շահագրգռված ենք հրադադարով, իրավիճակը վերադարձնելու ռուսական ագրեսիայի սկզբին՝ Ռուսաստանի ներկայության առումով»,- ասել է Կուլեբան։
Նախարարի խոսքով՝ «այժմ դեռ վաղ է կանխատեսել, թե կոնկրետ ինչ կստացվի բանակցությունների արդյունքում՝ հաշվի առնելով Ռուսաստանի այն դիրքորոշումները, որոնք հայտարարվել են»։
«Եկեք հաջողություն մաղթենք մեր բանակցողներին: Եթե Ռուսաստանը այդ բանակցություններին մոտենա, ինչպես ասում են, բարեխղճորեն, ապա հնարավոր կլինի ինչ-որ լուծումներ գտնել»,- եզրափակել է նա։
Նշենք, որ քիչ առաջ Ռուսաստանի Դաշնության և Ուկրաինայի պատվիրակությունները Բելովեժյան անտառում սկսել են բանակցությունների երկրորդ փուլը։ Հայտնի է, որ Ուկրաինայի հետ բանակցություններում «ռուսական առաջարկների» բլոկը բաղկացած է ռազմատեխնիկական, հումանիտար-միջազգային և քաղաքական մասերից։ Այս մասին հայտարարել է ՌԴ նախագահի օգնական, ռուսական կողմից գլխավոր բանակցող Վլադիմիր Մեդինսկին:
Հիշեցնենք, որ փետրվարի 28-ին Բելառուսի Գոմելի մարզում կայացել էր ռուս-ուկրաինական բանակցությունների առաջին փուլը: Հանդիպումը տևել էր հինգ ժամ։
