Հյուսիսատլանտյան դաշինքի (ՆԱՏՕ) գլխավոր քարտուղար Յենս Ստոլտենբերգը նշում է, որ Դաշինքը Ուկրաինայի հակամարտության կողմ չէ և չի ձգտում պատերազմել Ռուսաստանի հետ։
Ստոլտենբերգն այս մասին ասել է ԱՄՆ պետքարտուղար Էնթոնի Բլինկենի հետ Բրյուսելում ՆԱՏՕ-ի ԱԳ նախարարների հանդիպմանն ընդառաջ համատեղ մամուլի ասուլիսում։ Այս մասին հայտնում է UNIAN-ը։
Գլխավոր քարտուղարի խոսքով՝ այսօր Դաշինքի երկրների արտաքին գործերի նախարարները հանդիպում են՝ խորհրդակցելու և համակարգելու Ուկրաինա Ռուսաստանի բացահայտ ներխուժման և դրա հեռահար հետևանքների արձագանքը։
«Մենք դատապարտում ենք հարձակումները խաղաղ բնակչության վրա, ինչպես նաև գիշերվա ընթացքում ականատես եղանք ատոմակայանի վրա հարձակման մասին հաղորդումների: Սա ցույց է տալիս այս պատերազմի հանդգնությունը և այն դադարեցնելու կարևորությունը, Ռուսաստանի կողմից իր բոլոր ուժերը դուրս բերելու և դիվանագիտական ջանքերում բարեխղճորեն մասնակցության կարևորությունը»,- նշել է Ստոլտենբերգը։
Գլխավոր քարտուղարը հավելել է, որ անդամ երկրները աննախադեպ պատժամիջոցներ են կիրառել Ռուսաստանի դեմ, ինչպես նաև՝ աջակցություն ցուցաբերում Ուկրաինային։
«Միևնույն ժամանակ, ՆԱՏՕ-ն հակամարտության կողմ չէ, ՆԱՏՕ-ն պաշտպանական դաշինք է: Մենք չենք ցանկանում ռազմական հակամարտություն Ռուսաստանի հետ, բայց միևնույն ժամանակ մենք պետք է ապահովենք, որ թյուրիմացություն չլինի մեր բոլոր դաշնակիցներին պաշտպանելու վճռականության վերաբերյալ, այդ պատճառով մենք մեծացրել ենք ՆԱՏՕ-ի ուժերի ներկայությունը Դաշինքի արևելյան հատվածում. սա պաշտպանական ներկայություն է»,-նշել է Ստոլտենբերգը։
