Microsoft-ը դադարեցնում է նոր ապրանքների վաճառքը եւ ծառայությունների մատուցումը Ռուսաստանում: Այս մասին նշել է Microsoft-ի նախագահ Բրեդ Սմիթը:
«Ինչպես մնացած աշխարհը, մենք էլ սարսափած ենք, զայրացած եւ տխուր Ուկրաինայում պատերազմի պատկերից ու լուրերից եւ դատապարտում ենք Ռուսաստանի կողմից այս ոչ մի կերպ չարդարացված, անհիմն եւ անօրինական ներխուժումը», – ասել է Սմիթը:
Microsoft-ի նախագահը բացատրել է, որ ընկերությունը սերտորեն համագործակցում է Միացյալ Նահանգների, Եվրամիության եւ Միացյալ Թագավորության իշխանությունների հետ եւ դադարեցնում է իր բիզնեսը Ռուսաստանում՝ համաձայն իրենց կառավարությունների սահմանած պատժամիջոցների:
Ընկերության աշխատանքի կարեւորագույն ոլորտներից մեկը Սմիթը նշել է Ուկրաինայի կիբեռանվտանգությունը, նաեւ ասել է, որ պատերազմի սկզբից Սկսած՝ Microsoft-ը միջոցներ է ձեռնարկել ընդդեմ ռուսական «քայքայիչ գործողությունների»՝ ընդդեմ ուկրաինայի ավելի քան 20 պետական կազմակերպությունների՝ IT-ի եւ ֆինանսական ոլորտների:
Արեւմտյան շատ ընկերություններ սկսեցին սահմանափակել կամ դադարեցնել աշխատանքը Ռուսաստանի հետ Ուկրաինայի ներխուժումից եւ դրա պատճառով սահմանված տնտեսական պատժամիջոցներից հետո: Մասնավորապես, մարտի 4-ին տեղեկություն էր տարածվել, որ Cisco Systems-ը եւ Panasonic-ը դադարեցնում են բիզնեսը Ռուսաստանում, իսկ Revolut ծառայությունը դադարեցրել է փողերի փոխանցումը Ռուսաստանին եւ Բելառուսին, ինչպես նաեւ այդ երկրներից:
