Ռուսաստանի կառավարությունը հաստատել է այն երկրների և տարածքների ցանկը, որոնք «ոչ բարեկամական գործողություններ» են իրականացնում Ռուսաստանի, ռուսական ընկերությունների և քաղաքացիների նկատմամբ։ Այս մասին հայտնում է կառավարության մամուլի ծառայությունը։
Ցուցակը պատրաստվել է որպես ՌԴ նախագահ Վլադիմիր Պուտինի հրամանագրի մի մաս, որը թույլ է տալիս Ռուսաստանի քաղաքացիներին, ընկերություններին և հենց պետությանը ռուբլով վճարել «անբարյացակամ» երկրների պարտատերերին: Ցուցակում ներառված են Ավստրալիան, Ալբանիան, Անդորրան, Բրիտանիան՝ Ջերսին, Անգիլիան, Բրիտանական Վիրջինյան կղզիները և Ջիբրալթարը ներառյալ: Ցուցակում են նաև Եվրամիության անդամ երկրները` Իսլանդիան, Կանադան, Լիխտենշտեյնը, Միկրոնեզիան, Մոնակոն, Նոր Զելանդիան, Նորվեգիան, Կորեայի Հանրապետությունը, Սան Մարինոն, Հյուսիսային Մակեդոնիան, Սինգապուրը, ԱՄՆ-ը, Թայվանը, Ուկրաինան, Չեռնոգորիան, Շվեյցարիան և Ճապոնիա։
Ոչ բարեկամ երկրների ընկերությունների հետ բոլոր գործարքները կհաստատվեն օտարերկրյա ներդրումների վերահսկողության կառավարական հանձնաժողովի կողմից, նշում է կառավարության մամուլի ծառայությունը։
Նոր ընթացակարգի համաձայն՝ ռուսական կամ օտարերկրյա ընկերությունը պետք է գործարքի թույլտվություն խնդրի՝ տրամադրելով տեղեկություններ հայտատուի մասին, ներառյալ՝ ընկերության իրական սեփականատերերի մասին փաստաթուղթ: Հանձնաժողովը կուսումնասիրի փաստաթղթերը և որոշում կկայացնի։
«Միևնույն ժամանակ կարող է տրվել գործարքի իրականացման թույլտվություն՝ նշելով դրա կատարման պայմանները»,- ասվում է հաղորդագրության մեջ։
