“Аэрофлот” և “Россия” ավիաընկերությունները մարտի 8-ից դադարեցրել են բոլոր արտասահմանյան չվերթները։ Հետադարձ տոմսերով ուղևորները մարտի 6-ից կորցրել են Ռուսաստանից դուրս թռչելու հնարավորությունը՝ նրանք կարող են լքել երկիրը միայն միակողմանի տոմս գնելու դեպքում։ Օդային տրանսպորտի դաշնային գործակալությունը խորհուրդ է տվել, որ օտարերկրյա ռեգիստրներում գրանցված ավիաընկերությունները դադարեցնեն թռիչքները արտերկիր մարտի 6-ի ժամը 00:00-ից, իսկ արտերկրից թռիչքները մարտի 8-ին ժամը 00:00-ից։
Ռուսաստանում նաև երկարացվել է թռիչքների սահմանափակումները դեպի Անապա, Կրասնոդար, Գելենջիկ, Բելգորոդ, Բրյանսկ, Վորոնեժ, Կուրսկ, Լիպեցկ, Դոնի Ռոստով, Սիմֆերոպոլ և Էլիստա։
Այս որոշումներն ընդունվել են կապված այն պատժամիջոցների հետ, որոնք ԵՄ երկրները, ԱՄՆ-ը, Կանադան և մի քանի այլ երկրներ կիրառեցին Ռուսաստանի դեմ Ուկրաինա ներխուժումից հետո։ Ռուսական ավիաընկերությունների կողմից քաղաքացիական փոխադրումների համար օգտագործվող ինքնաթիռների ճնշող մեծամասնությունը վարձակալված է օտարերկրյա ընկերություններից, որոնք պատժամիջոցների սահմանումից հետո ստիպված են խզել լիզինգային պայմանագրերը և իրենց տեխնիկան հետ վերցնել: Պատժամիջոցների մասին որոշման համաձայն՝ նրանք դա անելու ժամանակ ունեն մինչև մարտի վերջ։
Այս պահին 980 օդանավերից 777-ը, որոնք Ռուսաստանն ունի մարդատար ավիացիայում, գտնվում են վարձակալության տակ։ Դրանցից 515 ինքնաթիռ, այսինքն՝ կեսից ավելին, վարձակալվել են արտասահմանյան ընկերություններից։ Ուղևորատար ինքնաթիռների լիզինգային համակարգի կասեցումը կազդի այնպիսի ավիաընկերությունների վրա, ինչպիսիք են “Аэрофлот”, “Россия”, “Уральские авиалинии”, S7 և Azur Air-ը:
Մանրամասները՝ սկզբնաղբյուրում։
