Ուկրաինայի նախկին նախագահ Վիկտոր Յանուկովիչը դիմել է Ուկրաինայի ներկայիս առաջնորդ Վլադիմիր Զելենսկիին՝ ասելով, որ նա «պարտավոր է ամեն գնով դադարեցնել արյունահեղությունը և հասնել խաղաղության համաձայնագրի»։ Յանուկովիչի ուղերձը հրապարակել է ՌԻԱ Նովոստի գործակալությունը։
Ուկրաինայի նախկին նախագահն ասել է, որ անընդհատ մտածում է, թե ճի՞շտ է վարվել՝ 2014 թվականին լքելով երկիրը։ Յանուկովիչի խոսքով՝ ինքը դա արել է արյունահեղությունից խուսափելու համար, սակայն նրա «զոհաբերությունը չի կանգնեցրել Մայդանի իշխանություններին»։ «Հիմա մտածում եմ՝ կարո՞ղ է ինչ-որ կերպ օգնել ուկրաինացի ժողովրդին»,- նշել է Յանուկովիչը։
«Ես ուզում եմ նախագահական և նույնիսկ մի փոքր հայրական ձևով դիմել Վլադիմիր Զելենսկիին. Վլադիմիր Ալեքսանդրովիչ, հավանաբար երազում եք իսկական հերոս դառնալ: Բայց հերոսությունը ցուցադրական չէ, այն մինչև վերջին ուկրաինացին կռվելու մասին չէ։
Դա անձնազոհության մեջ է, սեփական հպարտության ու հավակնությունների դեմ հաղթանակի մեջ՝ հանուն մարդկանց կյանքը փրկելու։ Ես շատ լավ հասկանում եմ, որ դուք շատ «խորհրդականներ» ունեք, բայց անձամբ դուք պարտավոր եք ամեն գնով դադարեցնել արյունահեղությունը եւ խաղաղության համաձայնություն ձեռք բերել։
Ձեզանից դա են սպասում Ուկրաինայում, Դոնբասում և Ռուսաստանում։ Ուկրաինացի ժողովուրդը և Արևմուտքում ձեր գործընկերները երախտապարտ կլինեն ձեզ: «Երանի խաղաղարարներին, որովհետև նրանք Աստծո որդիներ կկոչվեն» (Մատթեոսի Ավետարան 5 գլուխ 9)»,- ասել է Յանուկովիչը։
Նշենք, որ Վիկտոր Յանուկովիչը փախել է Ուկրաինայից 2014 թվականին՝ երկրում անկարգությունների բռնկումից հետո։ Այդ ժամանակվանից նա ապրում է Ռուսաստանում։ Կիևում Յանուկովիչին մեղադրեցին Մոսկվային Ուկրաինա զորքեր ուղարկելու խնդրանքով, ինչն իր հերթին հանգեցրեց Ղրիմի միացմանը Ռուսաստանին։
2019 թվականին Կիևի դատարանը Յանուկովիչին դատապարտեց 13 տարվա ազատազրկման՝ մեղավոր ճանաչելով պետական դավաճանության և պատերազմին աջակցելու մեջ։ Ռուսաստանի Դաշնության գլխավոր դատախազությունը հրաժարվել է Յանուկովիչին Ուկրաինային արտահանձնել՝ նրա հետապնդումը որակելով քաղաքական։
