Բյուջետային եկամուտների շատ լավ ցուցանիշներ ունենք. վարչապետ

Աննախադեպ չափի կապիտալ ծախսեր ենք նախատեսել 350 միլիարդ դրամի չափով, այսպիսի ցուցանիշ երբեք չի եղել և անկախ ամեն ինչից, մենք այդ կապիտալ ծախսերը իրականացնելու ենք: Այս մասին այսօր կառավարության հերթական նիստին ասաց ՀՀ վարչապետ Նիկոլ Փաշինյանը:

«Պետք է  արձանագրեմ, որ գոնե այս պահին ի հեճուկս բոլոր հոռետեսական կանխատեսումների և մեր լարվածության, մենք բյուջետային եկամուտների շատ լավ ցուցանիշներ ունենք»,- ասաց Նիկոլ Փաշինյանը և ՊԵԿ նախագահ Ռուստամ Բադասյանից հետաքրքվեց, թե  կարո՞ղ ենք արձանագրել, որ առաջին եռամսյակի բյուջեի հարկային եկամուտների պլանը գերակատարվել է:

Ռուստամ Բադասյանը դրական արձագանք տվեց և նշեց, որ գերակատարվել է մի քանի օր առաջվա դրությամբ: «Խոսքը առաջին եռամսյակի ցուցանիշը մի քանի միլիարդով գերակատարելու մասին է այն պարագայում, երբ այս ամիս ԵԱՏՄ ընդհանուր կաթսայից չենք ստացել մեզ հասանելիք բաժինը:  Այսինքն՝ մոտ վեց միլիարդ նույնիսկ չստանալու դեպքում մի քանի միլարդով կգերակատարենք առաջին եռամսյակի ցուցանիշը»,- ասաց նա և նշեց, որ հոռետեսական սպասումները մյուս եռամսյակներին է վերաբերում, իսկ Նիկոլ Փաշինյանը արձագանքեց, որ մյուս եռամսյակների հետ կապված էլ չունեն հոռետեսական սպասումներ, և ինքը շատ լավատեսական է տրամադրված:

Նշենք, որ Կառավարությունը 3 մլրդ 114 մլն դրամ հատկացրեց 1 ճանապարհահատվածի (27.5 կմ) և 2 կամուրջների շինարարական աշխատանքների, տեխնիկական և հեղինակային հսկողության ծառայությունների համար: