Կառավարությունը միայնակ չէ՝ խաղաղության օրակարգն ունի շատ լայն հանրային կոնսենսուս. Լ․ Նազարյան

Խորհրդարանական ընդդիմությունը շարունակաբար մերժում է կառավարության առաջարկը՝ հանդիպելու և ստանալու իր բոլոր հարցերի պատասխանները: Այս մասին այսօր Ազգային ժողովում իր ելույթում ասաց «Քաղաքացիական պայմանագիր» խմբակցության պատգամավոր Լենա Նազարյանը:

«Իրականում կարծում եմ, որ շատ բան չի էլ կորցնում, քանի որ ամեն ինչ ժամանակի ընթացքում ասվել է և հիմա էլ ասվում է: Կարծում եմ, որ պետք է իրենց էլ ճիշտ հասկանալ, հո չե՞ն կարող սեղանի շուրջ առանց փակագծերի խոսակցությունից հետո դուրս գալ և շարունակել ձևանալ անտեղյակ, իսկ այսպես իբր անիրազեկ են և հետևաբար անպատասխանատու, շատ հարմար կարգավիճակ են ընտրել իրնց համար»,- ասաց նա: Լենա Նազարյանը նշեց, որ իրեն զարմացնում է քաղաքացիական հանրության կեցվածքը:

«Ինձ համար պարզ է մի բան. փաստորեն, այս կառավարությունը, որն առաջ է տանում խաղաղության օրակարգը, բոլորից առաջադիմական է, սա շատ տարօրինակ է, քանի որ, որպես կանոն, հակառակն է լինում»,- ասաց նա:

Լենա Նազարյանը նկատեց՝ բայց այս կառավարությունը միայնակ չէ, և խաղաղության օրակարգը հանրային կոնսենսուս ունի: