Հանրային հեռուստաընկերությունը դատապարտում է Սոս Ջանիբեկյանի նկատմամբ տեղի ունեցած հետապնդումը

Հանրային հեռուստաընկերությունը խոր մտահոգություն է հայտնում Առաջին ալիքի հաղորդավար, դերասան Սոս Ջանիբեկյանի նկատմամբ այսօր կիրառված բռնության փորձի առնչությամբ և հրավիրում պատկան մարմինների ուշադրությունը:

Այս մասին ասված է հեռուստաընկերության կայքէջում:

«Սոս Ջանիբեկյանը վերջին մեկ տարում վարում է Հանրային հեռուստաընկերության «100 տուն Արցախում» ծրագիրը, որի նպատակն է բնակարանով ապահովել 44-օրյա պատերազմի հետևանքով տեղահանված և տունը կորցրած արցախցիներին:

Համայն հայության ջանքերով նոր բնակավայրի կառուցման ողջ ընթացքը հանրությանը ներկայացնելու համար Սոս Ջանիբեկյանը իր ժամանակի մեծ մասն անցկացնում է Արցախում, ներկայացնում արցախցիների հոգսերն ու առօրյան։

Դատապարտում ենք Ջանիբեկյանի նկատմամբ այսպիսի հետապնդումը և հույս հայտնում, որ սթափ քաղաքացիները զգոնություն կցուցաբերեն և կկանխեն բռնության կիրառումը որևէ մեկի հանդեպ: Դեպքի առնչությամբ հրավիրում ենք նաև պատկան մարմինների ուշադրությունը»:

Նշենք, որ այսօր երեկոյան Երևանի փողոցներում ակցիա իրականացնող ընդդիմադիրները ջրի շիշ էին նետել դերասան Սոս Ջանիբեկյանի ուղղությամբ, հայհոյել և անպարկեշտ արտահայտություններ հնչեցրել վերջինիս հասցեն: Ավելի ուշ ԱԺ «Քաղաքացիական պայմանագիր» խմբակցության պատգամավոր, արտաքին հարաբերությունների մշտական հանձնաժողովի նախագահ Էդուարդ Աղաջանյանը տեղեկացրեց, որ Ֆրանսիայի հրապարակին հարակից տարածքով է անցնելիս եղել, և ընդդիմադիր մի ակտիվիստ աղջիկ վերջինիս վիրավորել է՝ անվանելով «այ բոզ»:

Թիվ 1