Հայաստանը պետք է կողմ արտահայտվի Թուրքիայի՝ ԵՄ-ին անդամակցելու ձգտումներին․ Ա․ Բաբաջանյան

«Էսօրվա համար մի բան էլ գրեմ ու վերջ։

Նախօրեին տեսա մի հաղորդագրություն, ըստ որի Էրդողանը դիմել է ԵՄ-ին՝ Թուրքիայի անդամակցության հեռանկարները հասկանալու համար։ Եթե չեմ սխալվում, ԵՄ-ն, տարիներ առաջ, Թուրքիայի այդ կառույցին անդամակցության պայմանների մեջ նշել էր նաև Հայոց ցեղասպանությունը ճանաչելու պահանջը։

Կարծում եմ Հայաստան-Թուրքիա երկխոսության այս բարդ, բայց խիստ կարևոր շրջանը հաշվի առնելով, ինչպես նաև նկատի ունենալով գլոբալ և լոկալ մասշտաբի անվտանգային սպառնալիքները, Հայաստանը պետք է կողմ արտահայտվի Թուրքիայի՝ ԵՄ-ին անդամակցելու ձգտումներին։ Հայաստանը շատ ավելի հեշտությամբ կխոսի Եվրամիության անդամության ձգտող Թուրքիայի հետ։ ԵՄ-ի հետ Երևանի ջերմ և սերտ հարաբերությունները կարող են հավելյալ զսպող գործոն դառնալ Թուրքիայի նկատմամբ՝ Հայաստանի բանակցային սեղանին։

Բոլորն են հասկանում, որ ոչ կարճաժամկետ, ոչ միջնաժամկետ հեռանկարում Թուրքիայի ԵՄ-ին անդամակցելու հեռանկար գոյություն չունի, բայց ներկա պայմաններում Երևանից այդպիսի հայտարարությունը կարող է չափազանց օգտակար լինել և Անկարայի և արևմուտքի համար։ Անվիճելի է, որ Հայոց ցեղասպանությունը ճանաչելու պահանջը պետք է մնա Եվրամիությանն անդամակցելու Թուրքիային առաջադրված պայմանների շարքում։

Այդ պահանջը հայտնվել է պահանջները ցանկում ամենևին ոչ Երևանի ցանկությամբ և ջանքերով։ Միևնույն ժամանակ, Երևանի կողմից այդպիսի բովանդակությամբ հայտարարությունը կարող է էապես փոխել բանակցությունների շուրջ մթնոլորտը և երկկողմ մակարդակում և միջազգային գետնի վրա»,- գրել է «Հանուն Հանրապետության» կուսակցության նախագահ Արման Բաբաջանյանը։