Եթե կորցրեցինք Հայաստանը՝ մենք ի վիճակի չենք լինի այլևս պայքարել Արցախի համար | Ա․ Բաբաջանյան

Թիվ 1 ստուդիան հյուրընկալել է «Հանուն հանրապետության» կուսակցության նախագահ Արման Բաբաջանյանին։

Պարոն Բաբաջանյանը նշեց, որ այսօր ծավալվող արտաքին ու ներքին իրադարձություններն ավելի մեծ սպառնալիք և վտանգ են ներկայացնում Հայաստանի համար, քան նույնիսկ 2020 թ․ պատերազմը, որովհետև պատերազմը չէր սպառնում Հայաստանի գոյությանը, և այդ պատերազմում չէր վճռվում Հայաստանի պետականության հարցը։

Նա հավելոց, որ այսօր մեր ներքաղաքական օրակարգում ենք պահել Արցախը փրկելու հարցը, բայց դա չի կարող լինել ի գին Հայաստանի․ եթե մենք կորցրեցինք Հայաստանը՝ մենք ի վիճակի չենք լինի այլևս պայքարել Արցախի համար։

Բրյուսելը այն նվազագույնն է, որ Հայաստանին ընձեռվել է պահելու իր պետականությունը, ոտքի կանգնելու, Արցախի ժողովրդի իրավունքների և անվտանգության երաշխավորմամբ՝ ապագայում նաև կարգավիճակի հարցը բարձրացնելով։

Պարոն Բաբաջանյանի համոզմամբ՝ խոսելու այլընտրանքը պատերազմն է, որն այս պահին Հայաստանի համար կարող է ողբերգական լինել․ իսկ դրա այլընտարնք այն օրակարգն է, որը Հայաստանի իշխանությունն է բերել սեղանին։

Ստացվում է, որ այժմ ԱՄՆ-ը խորապես ներգրավված է Հարավային Կովկասի գործընթացներում, և ներգրավված է նաև Հայաստանի ջանքերով, և սա էապես բարձրացնում է Հայաստանի դերն ու սուբյեկտայնությունը․ և հենց այս հանգամանքն է անհանգստացրել մեր ռուս գործընկերներին և նրանց ծառաներին Հայաստանում։

Մենք հիմա պահանջում ենք, որ իշխանությունը պատշաճ կերպով անհրաժեշտ պաշտպանության տակ առնի երևանցիներին, ովքեր ամեն օր ստիպված են այս այլանդակությունը հանդուրժել փողոցներում։