Թիվ 1 ստուդիան հյուրընկալել է ԱԺ «Քաղաքացիական պայմանագիր» խմբակցության պատգամավոր Վիլեն Գաբրիելյանին։
Պարոն Գաբրիելյանը նշեց՝ մենք մեր նշաձողը դեռ չենք իջեցրել, մենք ուղղակի հնչեցրել ենք, որ միջազգային հանրությունից կա նմանատիպ առաջարկ՝ նշաձողն իջեցնելու կարգավիճակի մասով, բայց դա պետք է, այնուամենայնիվ, քննարկվի Արցախի իշխանությունների և ժողովրդի հետ։
«Այս մի ամսվա ընթացքում մենք՝ որպես կառավարող ուժ մեր քաղաքացիների իրավունքները հարգելով՝ թույլ ենք տվել ընդդիմադիրներին անցկացնել անհնազանդության ակցիաներ, բայց փաստացի մեկ ամսվա ընթացքում այդ քաղաքական օրակարգը լայն հասարակական զանգվածներից աջակցություն չստացավ․ ըստ այդմ ապացուցվում է այն, որ օրակարգը կեղծ էր ի սկզբանե»։
Նա նաև հավելեց, որ մեր ժողովրդին և Հանրապետությունը թրքացման փորձել են տանեն այն մարդիկ, որոնք քսան տարի շարունակ թուրքերի և ադրբեջանցիների հետ բանակցել են և ունեն իրենց հետ տարբեր շահեր։
Պատգամավորն ընդգծեց՝ Արցախի Հանրապետության հարցը ստեղծվել է Արցախի ժողովրդի ինքնորոշման իրավունքի հիման վրա, ըստ այդմ իրենք են որոշել իրենց կարգավիճակը դեռ 1991 թվականին և իրենք են որոշելու իրենց ապագան։
«Մենք պնդում ենք, որ Արցախի հարցը այդ տեսանկյունից իրավունքի հարց է մեզ համար, այլ ոչ թե տարածքային պահանջների։ Այդ իրավունքի հարցը ծագել է առաջին պատերազմի ժամանակ․ երբ այն սկսել է՝ Արցախի ժողովուրդն ունեցել է անվտանգության խնդիր»։
