Քաղաքապետարանը լուծումներ է փնտրում Մյասնիկյան պողոտայի կիսատ շինաշխատանքներն ավարտելու համար

Ի պատասխան Թիվ 1-ի հարցմանը Երևանի քաղաքապետարանը հայտնել է որ,Մյասնիկյան պողոտայի ամբողջ երկարությամբ լուսավորության հենասյուների տեղադրման համար արված փոսերի և դրանց վերականգնման համար քաղաքապետարանի կողմից նախաձեռնված աշխատանքներն իրականացվել են կապալառու կազմակերպության՝ ՀՁ «Օննինեն Օյ և Էնստո Օյ» ընկերության կողմից՝ Երևանի քաղաքապետարանի 28 փողոցների արտաքին լուսավորության ցանցի վերակառուցման ծրագրով նախատեսված շինմոնտաժային աշխատանքների շրջանակներում՝ համաձայն հաստատված նախագծի:

Շինմոնտաժային աշխատանքների կատարման ընթացքում առաջացել են բազմաթիվ բարդ կոմունիկացիոն խոչընդոտներ, որոնց պատճառով աշխատանքները դադարեցվել են: Երևանի քաղաքապետարանում կայանում են քննարկումներ՝ գտնելու նոր լուծումներ առաջացած խնդիրների կարգավորման վերաբերյալ: Վերջնական հաստատումից հետո աշխատանքները նորից կվերսկսվեն:

Նաև նշում է, որ «Երքաղլույս» ՓԲ ընկերությունը նշված խնդրի վերաբերյալ պարբերաբար տեղեկացրել է P&C CONSULTING CO. ընկերության ծրագրի ղեկավար Լ. Հովհաննիսյանին՝ խնդրին լուծում տալու համար: Ինչ վերաբերում է մայրաքաղաքը սնուցող գլխավոր պողոտաներից մեկի՝ Մյասնիկյան պողոտայի երթևեկության մեկ գիծը վերականգնելուն, քաղաքապետարանը նշել է, որ այն փակ չէ, սակայն ստեղծում է ժամանակավոր անհարմարություններ, որոնց համար հայցում են բնակիչների ներողամտությունը: