Աշխարհահռչակ ռոք երաժիշտ, System of a Down խմբի մենակատար Սերժ Թանկյանը ուղերձ է հղել՝ կոչ անելով միանալ իրեն Երևանում սեպտեմբերին անցկացվելիք StarmusVI փառատոնին:

Թանկյանը միլիոնից ավելի հետևորդներ ունեցող իր «Ինստագրամ»-ի էջում տեղադրած տեսաուղերձում, մասնավորապես, ասում է. «Սիրելի ընկերներ, միացեք ինձ StarmusVI  գիտության և արվեստի փառատոնին , որը տեղի է ունենալու Հայաստանում սեպտեմբերի 5-10-ին»:

Թանկյանը հիշեցնում է, որ փառատոնին լինելու են երաժշտություն, գիտական կոնֆերանսներ, դասախոսություններ, սիմպոզիումներ և այլն:

Հայաստանը սեպտեմբերին հյուրընկալելու է աշխարհահռչակ տիեզերագնացների՝ Չարլզ Բոլդենին (Charles Bolden), Քրիս Հադֆիլդին (Chris Hadfield), Ջիմ Բագյանին (Jim Bagian), Ջորջ Նիլդին (George Nield), Չառլի Դյուկին (Charlie Duke), Նոբելյան մրցանակակիրների՝ Էդվարդ Մոուզերին (Edvard Moser), Քիփ Թորնին (Kip Thorne),Էմմանուել Շարպենտիեին (Emmanuelle Charpentier), գիտնականների՝ Թոնի Ֆադելին (Tony Fadell), Բրայան Գրինին (Brian Greene), Դոննա Սթրիքլենդին (Donna Strickland), արտիստների՝Sons of Apollo խմբին, Ռիք Վեյքմանին (Rick Wakeman), Սերժ Թանկյանին (Serj Tankian), Տիգրան Համասյանին (Tigran Hamasyan), Անդրեյ Մակարևիչին (Andrey Makarevich), Դերեկ Շերինյանին (Derek Sherinian), մի շարք այլ միջազգային ճանաչում ունեցող արտիստների ու գիտնականների, ովքեր Հայաստան կայցելեն հատուկ փառատոնին մասնակցելու նպատակով: