Թիվ 1 ստուդիան հյուրընկալել է ռազմական փորձագետ, պահեստազորի գնդապետ Արծրուն Հովհաննիսյանին։
«Իմ կարծիքով մեր էլիտաները պետք է ի վերջո մեզ բացատրեն, ամբողջ ազգին, հերիք է մենք երազենք երկիր ունենալուց, մենք պիտի երազենք պետություն ունենալու մասին․ մենք պիտի պետությունը տարբերենք երկրից։ Այն զրկանքները, որով ժողովուրդներն անցնում են հանուն պետականության և վերջում ստանում են հզոր պետականություն, դա հեշտ բան չի և մենք պետք է պատրաստ լինենք դրան»,- նշեց պարոն Հովհաննիսյանը։
Նա հավելեց․ «Դժբախտաբար, ամենասարսափելի երազում անգամ չպատկերացրած, ամիսը հինգ դավաճան գտած էս դեպքերի մեջ էլ եմ օրինաչափություն տեսնում․ ինչ ցանել ենք այն հնձում ենք, և այս քավարանը, դժբախտաբար, մենք պիտի անցնենք։
Ես շատ դաժան բան պիտի ասեմ, բայց այս պարտության, այս վիճակից ուշքի գալ և փորձել անիվը ետ պտտելը երևի թե մեր ազգի պատմության ծանրագույն, դաժանագույն փուլերից մեկն է, և մենք պիտի անցնենք դա»։
Զրույցի ընթացքում պարոն Հովհաննիսյանն ընդգծեց․ «Ես չեմ կարծում, թե կա մի հայ, եթե իրականում ինքը իրեն հայ է համարում, չի սպասում այն հարմար պահին, որ ինքը կարողանա հակառակ կողմից թելադրել, ինչպես եղել է 1994 թվականին, բայց խելամիտ է արդյոք այս պահին ձեռքը սեղանին խփելը։
Հաղթանակը բթացնում է, պարտությունը՝ զգոնացնում։ Մենք հաղթանակի բթացումը տեսանք, հիմա հերթն է պարտության զգոնացման։ Այսինքն պիտի ուշքներս գլուխներս հավաքենք, դաս քաղենք, սերունդներին ճիշտ դաստիարակենք, ճիշտ կրթենք ու առաջ գնանք։ Մենք միանշանակ ապագայում ունենալու ենք շատ մեծ հաղթանակներ, ես չեմ կասկածում դրանում»,- եզրափակեց նա։
