Ընկերս Երևանում մեկ գիշերվա համար 500 եվրոյից պակաս արժեքով հյուրանոց գտնել չի կարողանում․ Քերոբյան

ՀՀ էկոնոմիկայի նախարար Վահան Քերոբյանը, այսօր Ազգային ժողովում լրագրողների հետ զրույցում անդրադառնալով այն փաստին, որ ներգաղթի հետևանքով ՀՀ-ում տների և հյուրանոցների արժեքները շատ են բարձրացել, հայտնել է, որ արժեքները անցել են նույնիսկ Մոսկվային և Սանկտ Պետերբուրգին:

«Այսօր իմ ընկերը ասաց, որ մեկ գիշերվա համար 500 եվրոյից պակաս հյուրանոց չի կարողանում գտնել: Առաջվա նման հարմար գներով հնարավոր չէ տուն վարձել Երևանում: Հիմա մենք փորձում ենք շուկա մտցնել ավելի մատչելի արժեքներով սենյակներ կամ տներ: Այս առումով աշխատում ենք թե՛ մասնավոր ընկերությունների հետ, թե՛ ներսում փորձում ենք ստեղծել ծրագիր, որը կօգնի թեթևացնել իրավիճակը»,- ասել է նա:

Անդրադառնալով ռուս-ուկրաինական պատերազմի հետևանքով ՀՀ-ում առաջացած գնաճին և այն զսպող մեխանիզմներին՝ նախարարը նշել է՝ այո, գնաճը բարձր է, բայց եթե համեմատենք այլ երկրների հետ, ապա բավականին լավ ենք դիրքավորված ընդհանուր գնաճի պայմաններում:

«Մեզ մոտ գնաճը մինչև 10 տոկոս է, օրինակ՝ Թուրքիայում գրանցվել է մոտ 80 տոկոս գնաճ: Առաջ մեզ մոտ ավելի մեծ էր գնաճը, քան զարգացած երկրներում, այս պահին մենք բավականին լավ դիրքում ենք ընդհանուր ներկապնակում: Մենք մեր ջանքերն ուղղում ենք նրան, որ խոցելի խավը ավելի չաղքատանա: Ներդրեցինք կենսաթոշակների բարձրացման նախագիծը, ինչպես նաև մյուս տարվա բյուջեն էլ զգալիորեն ավելի մեծ է, քան այս տարվանը»,- ընդգծել է Քերոբյանը: