Պուտինը հետաքրքրված չէ Ուկրաինայի հետ բանակցություններով

«Պուտինը շահագրգռված չէ Ուկրաինայի հետ լուրջ բանակցություններով և շարունակում է մաքսիմալիստական ​​նպատակներ հետապնդել՝ շարունակելով պատերազմն իր հռետորաբանության համաձայն». հոկտեմբերի 26-ի իր զեկույցում գրում է պատերազմի ուսումնասիրման ամերիկյան ինստիտուտը (ISW): 

Պուտինը, հանդիպելով ԱՊՀ երկրների անվտանգության և հետախուզական գերատեսչությունների ղեկավարների հետ, ասել է, որ Ուկրաինան «կորցրել է իր ինքնիշխանությունը», և ԱՄՆ-ն «այն օգտագործում է որպես զենք»՝ ընդդեմ Ռուսաստանի, ՀԱՊԿ-ի և ԱՊՀ-ի։

Ռուսաստանի պետդումայի խոսնակ Վյաչեսլավ Վոլոդինը ընդլայնել է այս թեման՝ հոկտեմբերի 26-ին ասելով, որ Ուկրաինան կորցրել է որպես պետություն գոյություն ունենալու ունակությունը, «օկուպացված է ՆԱՏՕ-ի կողմից» և «դարձել է Միացյալ Նահանգների գաղութը»։ 

«Նման բառապաշարը անհամատեղելի է հրադադարի շուրջ հավասար պայմաններով բանակցությունների հետ, էլ չասած հակամարտության կարգավորման մասին». կարծում են ISW-ի վերլուծաբանները։ 

Նրանց կարծիքով՝ Կրեմլը դեռևս ձգտում է Ուկրաինայում ռազմական հաղթանակի և Կիևում ռուսամետ ռեժիմի հաստատմանը։