Աժ փոխնախագահ Հակոբ Արշակյանն ԱԺ մշտական հանձնաժողովներում 2023թ. պետբյուջեի նախագծի քննարկմանը հետաքրքրվեց բանկային ոլորտում միջնորդավճարների բարձր սակագների պատճառներից։ Նա հիշեցրեց, որ այդ կապակցությամբ բողքներ են ստացվում և բիզնեսից, և անհատներից։
«Արդյո՞ք սրանք տնտեսությունից վերցված գումարներ չեն, որոնք պետք է ներդրվեին տնտեսության մեջ: Այս տարի փոխանցված տրանսֆերտների մինչև 3 տոկոսը գանձվել է բանկերի կողմից», -հարցրեց նա։
Կենտրոնական բանկի նախագահ Մարտին Գալաստյանը պարզաբանեց, որ աշխարհաքաղաքական ստեղծված իրավիճակում Հայաստանի տնտեսությունը կամ ՀՀ բանկային համակարգը սպասարկում է ոչ միայն ռեզիդենտներին, այլև ոչ ռեզիդենտներին.
«Օրինակ՝ ՀՀ բանկային համակարգի ստացված շահույթի մոտ 90 տոկոսը վերաբերում է ոչ թե վարկային պրոդուկտների տարբերության արդյունքում ձևավորված շահույթին, այլ՝ հարակից ծառայություններին, որոնց սպառողների մոտ 90 տոկոսը ոչ ռեզիդենտներ են: Այսինքն՝ եթե մենք անում ենք կապիտալի լրիվ ազատ ու բաց գործառնություններ, ինչպես որ արվում է, իսկ երկրներ կան, որտեղ գործում են սահմանափակումներ, մենք կարող ենք բախվել մի իրավիճակի հետ, որ ՀՀ բանկային համակարգը կդառնա այդ երկրների տնտեսությունները սպասարկող կամ կցորդ, ինչը մեզ համար չափազանց անցանկալի է»։
ԿԲ նախագահը մանրամասնեց, որ ազգային արժույթով կանխիկացմա դեպքում որևէ սակագին չի գործում.
«Սակագինը գործում է օտարերկրյա արժույթների վերաբերյալ, որոնց նկատմամբ Հայաստանի բանկային համակարգն ունի հասանելիության խնդիր, այսինքն՝ այս պահի դրությմամբ ԱՄՆ իշխանությունների կողմից վարվում է քաղաքականություն, որը սահմանափակում է իրենց արժույթի կանխիկի շրջանառությունն աշխարհում, ներառյալ՝ Հայաստանում, գնալով թանկանում են այդ տիպի ծառայությունների մատուցումները։ Եթե ժամանակին մեր բանկերը 0,1 կամ 0,2 տոկոսով կարողանում էին օտարերկրյա գործընկերներից կանխիկ արտարժույթ բերել, հիմա, սահմանափակումների արդյունքում, համ ավելացել է ներմուծվող գումարի նկատմամբ գանձվող մեծությունը, համ էլ չափազանց խստացվել են պայմանները, որոնցով կանխիկը տրամադրվում է»։
