ԱՄՆ-ը կողմ է՝ G20-ի առաջիկա գագաթնաժողովին Ուկրաինայի մասնակցությանը՝ չլինելով խմբի անդամ

ԱՄՆ իշխանությունները կողմ են, որ Ուկրաինան նույնպես մասնակցի G20-ի առաջիկա գագաթնաժողովին, եթե դրանում ներկայացված լինի Ռուսաստանը։ Այս մասին երկուշաբթի օրը ճեպազրույցում հայտարարել է Սպիտակ տան մամուլի քարտուղար Կարին Ժան Պիերը։

«Մենք շատ պարզ ենք եղել. եթե Ռուսաստանը կարող է մասնակցել G20-ին, ապա Ուկրաինան նույնպես պետք է նման հնարավորություն ունենա: G20-ի անդամները կարող են չեղյալ համարել Ռուսաստանի հրավերը: Ես կարող եմ երաշխավորել, որ ԱՄՆ-ը կլինի բանակցությունների սեղանի մի կողմում: Մենք կպաշտպանենք Ուկրաինային և կդատապարտենք Ռուսաստանին»,- ասել է նա։

Մինչ այդ Ժան Պիերը ճեպազրույցում կրկնել էր, որ ԱՄՆ նախագահ Ջո Բայդենը չի նախատեսում G20-ում հանդիպել իր ռուս գործընկեր Վլադիմիր Պուտինի հետ, իսկ հարցին, թե Զելենսկին կարո՞ղ է մասնակցել գագաթնաժողովին, եթե ՌԴ-ն հրաժարվի մասնակցությունից, խոսնակը պատասխանել է, որ դա Ուկրաինայի նախագահի և կառավարության որոշելիքն է:

G20-ի գագաթնաժողովը տեղի կունենա Բալիում նոյեմբերի 15-16-ը։ Երկուշաբթի օրը Ռուսաստանի նախագահի խոսնակ Դմիտրի Պեսկովը խոստացել է այս շաբաթ հայտարարել՝ արդյոք Ռուսաստանի ղեկավարը կմեկնի՞ Բալի՝ մասնակցելու գագաթնաժողովին։

Զելենսկին, որը հրավիրված էր հանդիպմանը, թեև Ուկրաինան G20-ի անդամ չէ, անցյալ շաբաթ ասաց, որ չի մասնակցի գագաթնաժողովին, եթե այնտեղ լինիՌուսաստանի նախագահը։