Ադրբեջանը ձգտելու է Արցախում ստեղծել հումանիտար աղետ, որպեսզի կյանքի կոչի իր ցեղասպան ծրագրերը. Թովմասյան

«Ադրբեջանցիների կողմից Արցախը Հայաստանին կապող միակ ճանապարհի փակումը հայ ժողովրդի նկատմամբ Ադրբեջանի էթնիկ ատելության, Արցախի շրջափակման Ադրբեջանի հանցավոր քաղաքականության, Արցախի ժողովրդի հիմնարար իրավունքների աղաղակող խախտման հերթական դրսևորումն է»։

Այս մասին հայտարարել է ԱԺ պատգամավոր Թագուհի Թովմասյանը՝ անդրադառնալով  ադրբեջանական կողմի կեղծ պնդումներին, որոնց պատճառով դեկտեմբերի 3-ին մի խումբ քաղաքացիական հագուստով անձինք փակել էին Ստեփանակերտ-Գորիս մայրուղին:

Թովմասյանը նշել է, որ այս քայլով Ադրբեջանը փորձում է աստիճանաբար ընդհատել հայկական երկու հանրապետությունների միջև գործող ենթակառուցվածքը և առաջիկայում իրականացնել արցախահայության նոր ցեղասպանություն։

«Միջազգային գործընկերներիս ուշադրությունն եմ հրավիրում Ադրբեջանի այս անօրինական, մարդու հիմնարար՝ կյանքի, առողջության, ազատության և մյուս համընդհանուր իրավունքները ոտնահարող վարքագծի վրա։

Ադրբեջանցիները Արցախը սնուցող միակ ճանապարհը փակելով՝ արգելափակել են բժշկական պարագաների և դեղամիջոցների տեղափոխումը Արցախ, առողջական ծանր խնդիրներ ունեցող հիվանդներին հնարավոր չի եղել այդ ողջ ընթացքում Արցախից հասցնել Հայաստան՝ անհրաժեշտ բժշկական օգնություն տրամադրելու համար»,-նշել է Թովմասյանը։