ՀՀ ԿԳՄՍ փոխնախարարը ներկա կլինի Վախթանգ Կիկաբիձեի հոգեհանգստի և վերջին հրաժեշտի արարողություններին

ՀՀ ԿԳՄՍ նախարարի տեղակալ Արայիկ Խզմալյանը մեկնել է Վրաստան՝ մասնակցելու վրաց դերասան, երգիչ, սցենարիստ, պրոդյուսեր, կոմպոզիտոր, Վրացական ԽՍՀ ժողովրդական արտիստ, ԽՍՀՄ պետական մրցանակի դափնեկիր Վախթանգ Կիկաբիձեի հոգեհանգստի և վերջին հրաժեշտի արարողություններին:

Վախթանգ Կիկաբիձեն ծնվել է 1938 թվականի հուլիսի 19-ին Թբիլիսիում։ Կինոյում նկարահանվել է 1966 թվականից, միաժամանակ «Օրէրա» համույթի կատարողներից էր: Կինոյում առաջին անգամ խաղացել է ռեժիսոր Նիկոլայ Սանիշվիլիի «Հանդիպում լեռներում» ֆիլմում:

Կիկաբիձե արտիստի արվեստը դարձել է միլիոնավոր մարդկանց ներշնչանքի և գեղարվեստական վայելքի աղբյուր: Հայերի համար նրա կերպարը թանկ էր կրկնակի, քանի որ անբաժանելի էր հայ մեծ արտիստ Մհեր (Ֆրունզիկ) Մկրտչյանի կյանքի և ստեղծագործական գործունեության ընթացքից: Կիկաբիձեի ամենահիշարժան դերերից Վալիկո Միզինդարի կերպարն է Գեորգի Դանելիայի «Միմինո» ֆիլմում, որն էկրան է բարձրացել 1978 թվականին և արժանացել ԽՍՀՄ պետական մրցանակի: