Եգիպտոսի Արաբական Հանրապետության նախագահ Աբդել Ֆաթթահ Ալ-Սիսին և Հայաստանի նախագահ Վահագն Խաչատուրյանը քննարկել են տնտեսական, քաղաքական և անվտանգության ոլորտում երկկողմ հետաքրքրություն ներկայացնող մի շարք հարցեր։ «Արմենպրես»-ը տեղեկացնում է, որ մամուլի համար հայտարարության ժամանակ Եգիպտոսի նախագահ Աբդել Ֆաթթահ Ալ-Սիսին շնորհակալություն է հայտնել հայկական կողմին ջերմ ընդունելության համար։
«Ինձ շատ հաճելի է այցելել Երևան, և իմ անկեղծ շնորհակալությունն ու խորին երախտագիտություն եմ հայտնում այս ջերմ հյուրընկալության և ընդունելության համար, որը վայելում եմ բարեկամ Հայաստան ժամանելու ընթացքում»,- ընդգծել է Եգիպտոսի նախագահը։
Ալ-Սիսիի խոսքով՝ այս այցն արտացոլում է Եգիպտոսի հետաքրքրությունը Հայաստանի նկատմամբ։ Նա ընդգծել է, որ Եգիպտոսը շահագրգռված է զարգացնելու հայ-եգիպտական հարաբերությունները, որոնք պատմական խոր արմատներ ունեն։
Աբդել Ֆաթթահ Ալ-Սիսին բարձր է գնահատել եգիպտահայ համայնքի ներդրումը Եգիպտոսի ամենատարբեր ոլորտներում՝ քաղաքական, տնտեսական, մշակութային և այլն։
«Նրանց դերը լավագույն ազդեցությունն է ունեցել Եգիպտոսի հասարակական կյանքի հարստացման գործում»,- ասել է Եգիպտոսի նախագահը։
Ալ-Սիսին հայտնել է, որ առանձնազրույցի ընթացքում Վահագն Խաչատուրյանի հետ քննարկել է Եգիպտոսից գազի և էներգիայի արտահանման հարցերը։
«Այս համատեքստում Եգիպտոսի անունից երախտագիտություն եմ հայտնում Նորին Գերազանցություն նախագահ Վահագն Խաչատուրյանին՝ ՄԱԿ-ի կլիմայի փոփոխության շրջանակային կոնվենցիային նվիրված համաշխարհային գագաթնաժողովին մասնակցելու համար, որը տեղի է ունեցել 2022 թվականի նոյեմբերին Շարմ էլ Շեյխում, որն արտացոլում է Հայաստանի կողմից ուշադրությունը կլիմայի խնդրին»,- շեշտել է Եգիպտոսի նախագահը։
Եգիպտոսի և Հայաստանի նախագահները քննարկել են նաև տնտեսական համագործակցության հարցերը՝ ընդգծելով երկու երկրների միջև առևտրաշրջանառության աճի անհրաժեշտությունը։
Երկու նախագահները քննարկել են նաև ընդհանուր հետաքրքրություն ներկայացնող մի շարք միջազգային և տարածաշրջանային հարցեր։
«Ընդգծել եմ բանակցությունների և քրտնաջան աշխատանքի կարևորությունը համապարփակ և արդար խաղաղության հասնելու համար»,- եզրափակել է Եգիպտոսի նախագահը։
