Անգլիայի եկեղեցին այսուհետ կօրհնի միասեռ զույգերի ամուսնությունները։ Անգլիայի Եկեղեցու Գլխավոր Սինոդի անդամները կողմ են քվեարկել այս որոշմանը, հայտնում է կառույցի կայքը։
«Անգլիայի Եկեղեցու Գլխավոր Սինոդը ողջունել է առաջարկները, որոնք թույլ կտան միասեռ զույգերին գալ եկեղեցի քաղաքացիական ամուսնության կամ քաղաքացիական գործընկերության մեջ մտնելուց հետո՝ շնորհակալություն հայտնելու, իրենց հարաբերությունները Աստծուն նվիրելու կամ Աստծո օրհնությունը ստանալու համար», ասված է հայտարարության մեջ։
Անգլիայի եկեղեցու եպիսկոպոսները նաև ներողություն են խնդրել ԼԳԲՏՔ+ ներկայացուցիչներից՝ եկեղեցիներում «մերժողական, անհանդուրժողական և թշնամական» վերաբերմունքի բախվելու և այդ ամենի ազդեցությունն իրենց կյանքում զգալու համար:
Անգլիայում, Շոտլանդիայում և Ուելսում նույն սեռի ներկայացուցիչների միջև ոչ եկեղեցական ամուսնությունները սկսել են գրանցվել 2014 թվականին, իսկ Հյուսիսային Իռլանդիայում՝ 2020 թվականին։
Ի դեպ, օրերս Հռոմի պապ Ֆրանցիսկոսը հայտարարել էր, որ միասեռականությունը հանցանք չէ՝ միևնույն ժամանակ ոչ ավանդական սեռական կողմնորոշումն ունենալը քրեականացնող օրենքները որակելով «անարդար»:
21:15
Սեպտեմբեր 29, 2026
