Նոր սկանդալ․ Թրամփի ու Փենսի մոտ կրկին գաղտնի փաստաթղթեր են գտել

ԱՄՆ նախկին նախագահ Դոնալդ Թրամփի փաստաբանները Ֆլորիդայում գտնվող Մար-ա-Լագոյի կալվածքում հայտնաբերել են գաղտնի փաստաթղթեր և պետության նախկին ղեկավարի օգնականի նոթբուքը։

Դրանք փոխանցվել են Հետաքննությունների դաշնային բյուրոյին (ՀԴԲ), այդ մասին AP-ին և ABC-ին հայտնել են աղբյուրները:

Բացի այդ, ՀԴԲ-ի գործակալները նախկին փոխնախագահ Մայք Փենսի մոտ մեկ այլ գաղտնի փաստաթուղթ են գտել Ինդիանայում, NBC-ին ասել է նրա խորհրդական Դևին Օ՛Մելլին։

Փենսի ներկայացուցչի խոսքով՝ նրա փաստաբանները համաձայնել են խուզարկությանը, որը տեւել է հինգ ժամ։

Փոխնախագահը փաստաբաններին հանձնարարել է «շարունակել համագործակցությունը պատկան մարմինների հետ և լինել լիովին բաց, մինչև գործընթացի ավարտը»։

Գտնված գաղտնի փաստաթղթերի շուրջ սկանդալը սկսվել է 2022 թվականի ամռանը Թրամփի նստավայրում տեղի ունեցած խուզարկություններով։ Նախորդ տարվա աշնանը գաղտնի փաստաթղթեր են հայտնաբերվել նախագահ Ջո Բայդենի տանը, իսկ 2023 թվականի հունվարին՝ Փենսի մոտ։