ԱՀԿ-ն հայտնում է COVID-19-ի դեպքերի կրճատման մասին

Վերջին 28 օրվա ընթացքում աշխարհում COVID-19-ով վարակվածների եւ մահերի թիվը նվազել է համապատասխանաբար 89%-ով եւ 62%-ով, նախորդ 28 օրվա համեմատ։ Այս մասին հայտնում է Առողջապահության համաշխարհային կազմակերպությունը (ԱՀԿ), փոխանցում է «ՌԻԱ Նովոստին»։

«Ամբողջ աշխարհում վերջին 28 օրվա ընթացքում (հունվարի 23-ից փետրվարի 19-ը) գրանցվել է մոտ 5,3 միլիոն նոր դեպք եւ ավելի քան 48 000 մահվան դեպք, ինչը նախորդ 28 օրվա համեմատ համապատասխանաբար 89 տոկոսով եւ 62 տոկոսով պակաս է»,- ասվում է ԱՀԿ-ի վերջին շաբաթական համաճարակաբանական զեկույցում։

Փետրվարի 22-ի դրությամբ աշխարհում գրանցվել է COVID-19-ի ավելի քան 757 միլիոն հաստատված դեպք եւ ավելի քան 6,8 միլիոն մահ: ԱՀԿ-ի գլխավոր տնօրեն Թեդրոս Ադհանոմ Գեբրեեսուսն ավելի վաղ ասել էր, որ կառավարությունների տրամադրության տակ եղած հասանելի գործիքները պետք է թույլ տան, որ COVID-19-ի համավարակն ավարտվի այս տարի: