G20-ի ԱԳ նախարարները չեն կարողացել համաձայնեցնել վերջնական հռչակագիրը

G20-ի երկրների արտգործնախարարները չեն կարողացել համաձայնեցնել Նյու Դելիում կայացած գագաթաժողովի արդյունքներով վերջնական հայտարարությունը։ Փոխարենը Հնդկաստանը կհրապարակի սեփական կոմյունիկեն:

«Ուկրաինական հակամարտության հարցում տարբեր մասնակիցների միջեւ կային տարաձայնություններ, տարաձայնություններ, որոնք մենք չկարողացանք լուծել»,- ասել է Հնդկաստանի արտգործնախարար Սուբրամանյամ Ջայշանքարը։

Ամփոփիչ հայտարարության նախագիծը պարունակել է 24 կետ։ Դրանցից երրորդի ու չորրորդի դեմ համատեղ հանդես են եկել Ռուսաստանն ու Չինաստանը։ Նախագծում դատապարտվում է «Ռուսաստանի պատերազմն Ուկրաինայի դեմ, պարունակվում է Ուկրաինայի տարածքից ռուսական զորքերի ամբողջական եւ անվերապահ դուրսբերման պահանջ, խոսվում է համաշխարհային տնտեսության վրա ռազմական գործողությունների բացասական ազդեցության, միջազգային իրավունքի նորմերը պահպանելու անհրաժեշտության, միջուկային զենքի կիրառման անթույլատրելիության մասին»։

Իր հերթին, Ռուսաստանի արտգործնախարար Սերգեյ Լավրովը վերջնական փաստաթուղթը չստորագրելու համար մեղադրել է արեւմտյան երկրներին։ Նրա խոսքով՝ Արեւմուտքը հրաժարվել է G20-ի հռչակագրում արտացոլել «Հյուսիսային հոսք» գազատարների պայթեցման հետ կապված ազնիվ հետաքննության անհրաժեշտությունը։

Անցյալ շաբաթ նույնպես G20-ի ֆինանսների նախարարները չեն կարողացել համաձայնության գալ վերջնական հռչակագրի շուրջ: