Եվրամիությունը հավանություն է տվել Ռուսաստանի դեմ պատժամիջոցների երկարաձգմանը

Եվրամիությունը կիրառության մեջ է դրել հակառուսական պատժամիջոցների ցուցակը հաջորդ վեց ամսով երկարաձգման մասին որոշումը՝ դրանից հեռացնելով Խերսոնի շրջանի մահացած փոխնահանգապետ Կիրիլ Ստրեմուսովին։ ԵՄ խորհրդի համապատասխան որոշումը երեքշաբթի հրապարակվել է Եվրամիության պաշտոնական ամսագրում։

«Հաշվի առնելով շարունակվող գործողությունները, որոնք խաթարում և սպառնում են Ուկրաինայի տարածքային ամբողջականությանը, ինքնիշխանությանը և անկախությանը, որոշումը [Ռուսաստանի ֆիզիկական և իրավաբանական անձանց նկատմամբ պատժամիջոցների մասին] պետք է երկարաձգվի ևս վեց ամսով»,- ասվում է փաստաթղթում։

Բացի Ստրեմուսովից, սև ցուցակից դուրս են մնացել նաև Պետդումայի մահացած պատգամավոր Նիկոլայ Պետրունինը և «Կոմսոմոլսկայա պրավդա»-ի ղեկավար Նիկոլայ Սունգորկինը։

Ավելի վաղ ԵՄ-ն երկարաձգել էր մինչև 2024 թվականի փետրվարի 24-ը Ռուսաստանի Դաշնության դեմ պատժամիջոցները՝ կապված 2022 թվականին Դոնեցկի և Լուգանսկի Ժողովրդական Հանրապետությունների, ինչպես նաև Խերսոնի և Զապորոժիեի շրջանների կարգավիճակի փոփոխության հետ։

Եվրամիությունը Ռուսաստանի համար սկսել է սեւ ցուցակ կազմել 2014 թվականի մարտին՝ վեց ամիսը մեկ երկարացնելով այն վեց ամսով։ Այս ցուցակում ընդգրկված բոլոր անձանց արգելվում է մուտք գործել ԵՄ տարածք, նրանց ֆինանսական ակտիվները ԵՄ-ում ենթակա են սառեցման, իսկ եվրոպական բիզնեսներին արգելվում է նրանց հետ որևէ կապ պահպանել։