2022 թ. տնտեսական աճը հնարավորություն է տվել բարելավելու ՀՆԱ ցուցանիշը. ֆինանսների նախարար

2022 թվականին գրանցված տնտեսական աճը և զարգացումները հնարավորություն են տվել բարելավելու պարտքեր/ՀՆԱ ցուցանիշը: Կառավարության ծրագրով նպատակադրված էր 2026 թվականին այն իջեցնել 60 տոկոսից ցածր, սակայն 2022 թվականի արդյունքներով արձանագրվել է էական բարելավում.

պարտքեր/ՀՆԱ ցուցանիշը տարեվերջի դրությամբ նվազեցվել է 46,7 տոկոսի: Այս մասին ասել է ՀՀ ֆինանսների նախարար Վահե Հովհաննիսյանն ԱԺ տնտեսական հարցերի մշտական հանձնաժողովի այսօրվա նիստում, որտեղ քննարկվել է «ՀՀ կառավարության ծրագրի (2021-2026 թթ.) 2022 թվականի կատարման ընթացքի և արդյունքների մասին» զեկույցը՝ հայտնում է ԱԺ պաշտոնական կայքը:

Վերոնշյալ ցուցանիշի վրա ազդել է երեք հիմնական հանգամանք` տնտեսական առաջանցիկ տեմպը, փոխարժեքը, նաև պակասուրդի ավելի ցածր մակարդակը:

Բարելավում է արձանագրվել նաև հայկական դրամով պարտքի մասնաբաժնի մեջ: 2022 թվականի դեկտեմբերի 31-ի դրությամբ՝ դրամով արտահայտված պարտքի կշիռը կազմել է 37,9 տոկոս` նախորդ տարվա նույն ժամանակահատվածի համեմատ աճելով 9,1 տոկոսով: Նախարարը տեղեկացրել է, որ նախատեսվել են նաև մի շարք հարկային փոփոխություններ:

«Եկամուտների մասով ունեցել ենք պլանի համեմատ 82 մլրդով ավելի հավաքագրում, ինչպես նաև այլ եկամուտների գծով մոտավորապես 60 մլրդով ավելի հավաքագրումներ: Սա հնարավորություն է տվել ավելացնելու մեր կապիտալ ծախսերի մակարդակը, նաև որոշ ընթացիկ ծախսեր: Մենք նպատակադրվել ենք 2026 թվականին կապիտալ ծախսերի մակարդակը ՀՆԱ-ում ավելացնել մինչև վեց տոկոսից ավելի մակարդակի»,- ընդգծել է նախարարը:

Հավելյալ եկամուտների զգալի մասն ուղղվել է ՊՆ կապիտալ ծախսերի բավարարմանը, որը կատարվել է 100 տոկոսով: 2021 թվականին պլանը կազմել է 88 մլրդ դրամ, 2022 թվականի համար պլանավորվել էր 122 մլրդ: «Եթե 2021 թվականին փաստացի ծախսել էինք 107 մլրդ ՊՆ կապիտալ ծախսերի համար, ապա այդ 107 մլրդը 2022 թվականին կազմել է 237 մլրդ, այսինքն` 129 մլրդով ավելի գումար»,- արձանագրել է Վահե Հովհաննիսյանը:

Նա նշել է, որ խնդիրներ կան միջազգային դոնոր կազմակերպություններից ներգրավվող ծրագրերի իրականացման հետ կապված, որտեղ կարևոր անելիքներ կան:

ՀՀ տարածքային կառավարման և ենթակառուցվածքների նախարար Գնել Սանոսյանը տեղեկացրել է, որ հաշվետու տարում 24 ծրագրով 146 միջոցառում է եղել նախատեսված, բյուջեն կազմել է 238 մլրդ դրամ, կատարողականը կազմել է 95 տոկոս: Նախարարն ըստ ոլորտների ներկայացրել է կատարված աշխատանքը: