Զենքի շրջանառությունը կարգավորող օրենքն ուժի մեջ մտնելու ժամկետը կերկարաձգվի

Զենքի շրջանառությունը կարգավորող օրենքն ուժի մեջ մտնելու ժամկետը նախատեսվում է երկարաձգել։

Ներքին գործերի փոխնախարար Արփինե Սարգսյանը, ներկայացնելով նախագիծը, նշեց.

«Փաթեթով առաջարկվում է հետաձգել «Զենքի շրջանառության կարգավորման մասին» օրենքի գործողության ժամկետը: Այս պահի դրությամբ նախատեսված է, որ պաշտոնական հրապարակումից 6 ամիս հետո պետք է օրենքն ուժի մեջ մտնի:

Պաշտոնական հրապարակումը եղել է հոկտեմբերի 27-ին, ուժի մեջ մտնելու ժամկետն ստացվում է ապրիլի 28-ը:

Հաշվի առնելով այն հանգամանքը, որ փաթեթից բխող 3 տասնյակ ենթաօրենսդրական ակտեր դեռ պետք է ընդունվեն, որոնք կապահովեն նոր օրենքի անխափան գործունեությունը, առաջարկվում է ժամկետը հետաձգել մինչև հուլիսի 1, որպեսզի կարողանանք կառավարության հաստատմանը բովանդակային, պատշաճ ներկայացնել բոլոր ենթաօրենսդրական ակտերը և ըստ այդմ պատրաստ լինել ամբողջական կիրառմանը»։

Ըստ նրա՝ բուն ժամկետն առաջարկվում է նաև «Լիցենզավորման մասին» օրենքում փոփոխություններ և լրացումներ կատարելու մասին օրենքի շրջանակներում, որով հրաձգարանների լիցենզավորման պահանջ է նախատեսված: Դա թույլ կտա ապահովել լիցենզավորման կարգը, պայմանները, հրաձգարանների կահավորման պայմանները և այլն: