ՀՀ արտաքին գործերի փոխնախարար Պարույր Հովհաննիսյանն անդրադարձել է հայ-ադրբեջանական սահմանին Ադրբեջանի վերջին ռազմական սադրանքներին։
Նրա խոսքով, սա Ադրբեջանի կողմից նոր գործելաոճ չէ. «1995 թվականից ԱԳՆ համակարգում եմ և չեմ հիշում մեկ բանակցությունների փուլ, որ չլինեն նման սադրանքներ կամ մինչև հանդիպումը, կամ հանդիպումից հետո:
Ցավոք, այսպիսի ավանդույթ է ձևավորվել»,-ասաց Հովհաննիսյանը։
Այս համատեքստում, անդրադառնալով ՀՀ վարչապետ Նիկոլ Փաշինյանի հայտարարությանը, թե Սոթքի ուղղությամբ մայիսի 11-ին ադրբեջանական հերթական սադրանքի նպատակն է զրոյացնել Վաշինգտոնում բանակցությունների ընթացքում արձանագրված առաջընթացը, ի՞նչ առաջընթացի մասին է խոսքը, նա նշել է, թե դա վերաբերվում է երկու կողմերի մոտեցումների վերաբերյալ ավելի լավ պատկերացումներ ստանալուն:
Ըստ փոխնախարարի. «Դա արվեց: Ամերիկյան կողմը հնարավորն արեց, որ ստեղծվի դրական մթնոլորտ: Իսկապես արդյունավետ փուլ էր՝ հնարավոր պայմանագրի նախագծի շուրջ մոտեցնելու դիրքորոշումները:
Իհարկե, կան մի շարք կարևորագույն հարցեր, որ դեռ պետք է քննարկվեն, հենց դրա համար է, որ Բրյուսելում կազմակերպվում է արդեն բարձրագույն մակարդակով հանդիպումը, որին կհաջորդի Մոսկվայում ԱԳ նախարարների մակարդակով հանդիպումը, կլինեն այլ հանդիպումներ ևս»։
