Անկարան չի աջակցի արևմտյան երկրներին Ռուսաստանի և նրա նախագահ Վլադիմիր Պուտինի դեմ պատժամիջոցներ սահմանելու հարցում։ Այս մասին հայտարարել է Թուրքիայի նախագահ Ռեջեփ Թայիփ Էրդողանը` ելույթ ունենալով Սիվաս նահանգում տեղի ունեցած հանրահավաքում։ ՓՈխանցում է Անադոլու գործակալությունը։
Էրդողանի հայտարարությունն արվել է ի պատասխան Թուրքիայի նախագահի թեկնածու, Ժողովրդահանրապետական կուսակցության առաջնորդ Քեմալ Քըլըչդարօղլուի հայտարարության, որը խոստացել էր կոշտ պատժամիջոցներ կիրառել Մոսկվայի դեմ իշխանության գալու դեպքում։
Էրդողանը նաև ընդգծել է, որ դրական կապեր է պահպանում իր ռուս գործընկեր Վլադիմիր Պուտինի հետ։ «Պարոն Քեմալն (Քըլըչդարօղլուն) ուրախ չէ, որ ես լավ հարաբերություններ եմ պահպանում պարոն Պուտինի հետ։ Նա ասում է.
«Ես հնազանդվելու եմ Արևմուտքի հրամաններին, պատժամիջոցներ եմ կիրառելու Պուտինի դեմ»։ Դուք քաղաքականությունից բացարձակապես չեք հասկանում, պարոն Քեմալ, գնացեք հանգստանալու»,- մասնավորապես ասել է Թուրքիայի ղեկավարը։
Նա հավելել է, որ այդ գործոնի շնորհիվ Թուրքիան կարող է միջնորդ հանդիսանալ Ռուսաստանի և Ուկրաինայի միջև։ Էրդողանի խոսքով՝ Թուրքիան կշարունակի զարգացնել եղբայրական Ադրբեջանի հետ տրանսպորտային հաղորդակցության ենթակառուցվածքը։ Այդ մասին նա հայտարարել է՝ մեկնաբանելով Քեմալ Քըլըչդարօղլուի՝ «Մետաքսի ճանապարհի վերածննդի» նախագծում Ադրբեջանի չներառումը։
«Թուրքիան կզարգացնի ադրբեջանցի եղբայրների հետ տրանսպորտային հաղորդակցության ենթակառուցվածքը, չնայած այն բանին, որ Քեմալն անտեսում է Ղարաբաղը և Զանգեզուրի միջանցքը»,- ասել է Թուրքիայի ղեկավարը և հայտարարել է Թուրքիայում արագընթաց երկաթուղու կառուցման մասին, որը ձգվելու է մինչև Բաքու։
«Լոնդոնից մեկնողը կկարողանա մեր երկրի տարածքով հասնել Պեկին։ Իհարկե, մենք այս ամենը կիրականացնենք ոչ թե Ադրբեջանին բացառելով, այլ նրա հետ ուս-ուսի տված»,- ասել է Թուրքիայի ղեկավարը։
