ԱԺ պատգամավոր Գուրգեն Արսենյանն իր լիակատար աջակցությունն է հայտնում ՀՀ վարչապետ Նիկոլ Փաշինյանի կողմից իրականացվող քաղաքականությանը, այդ թվում՝ խաղաղության օրակարգը իր ավարտին հասցնելու ձգտումներին:Այս մասին վերջինս հայտարարեց այսօր ԱԺ-ում՝ լրագրողների հետ զրույցում:«Երկու ձեռքով պաշտպանելու եմ մեր խաղաղության օրակարգը, այն գործընթացը, որը բերելու է հարևան երկրի հետ խաղաղության, այդ թվում՝ տարածքային ամբողջականության փոխադարձ ճանաչմանը, այն տարածքային կորդինատներով, որը ընդունվել է 1991 թվականին ԱՊՀ երկրների կողմից: Եվս մեկ անգամ վերահաստատում եմ իմ աջակցությունը և ասում եմ, որ մենք վճռական ենք ՀՀ անունից, ՀՀ ժողովրդի անունից ավարտին հասցնել մեր հարևանների հետ՝ Ադրբեջանի հետ խաղաղության գործընթացը, ինչպես նաև Թուրքիայի հանրապետության հետ հարաբերությունների կարգավորման գործընթացը, որը որ համարում եմ մեր քաղաքական թիմի կարևորոգույն առաքելությունը»,- ասաց Արսենյանը:Պատգամավորը շեշտեց, որ իրենց քաղաքական թիմի առաջնային խնդիրը ՀՀ պետական շահերի պաշտպանությունն է. «Համար մեկ խնդիրը որի համար մենք գործում ենք: Ցանկացած այլ պետական կամ քաղաքական գործիչ, ով կպնդի, որ ՀՀ շահերը պետք է ստորադասվեն օրակարգի որևէ այլ հարցի լուծմանը, իմ կարծիքով իրականացնում են հակապետական գործունեություն»:Հարցին, թե Արցախում հայեր չեն ապրում Գուրգեն Ասենյանը արձագանքեց. «Արցախում ապրում են մեր հայրենակիցները՝ հայեր, Ջավախքում էլ են ապրում հայեր, Բեյրութում, Գլենդելում էլ են ապրում հայեր: Մեր պետական պաշտոնյաների, գործիչների առաջնային խնդիրը ՀՀ շահերի սպասարկումը և պաշտպանությունն է»:
06:13
Մայիս 8, 2026
