«2022 թիվն ընդգծվեց Հայաստանի նկատմամբ սեպտեմբերյան ագրեսիայով». հայտարարել է վարչապետ Նիկոլ Փաշինյանը՝ 2022թ պետական բյուջեի կատարողականի նախնական քննարկումների ժամանակ։
Նրա խոսքով՝ տարածաշրջանում ռազմաքաղաքական իրադրությունը շարունակում է մնալ բավական լարված. «Դա կապված է ոչ միայն մեր ունեցած բարդ հարաբերությունների հետ, այլև գլոբալ պրոցեսների, ՌԴ-Ուկրաինա հակամարտության հետ։ Հիմա շատ տագնապալի լուրեր ենք ստանում Իրանի և Աֆղանստանի սահմանին տեղի ունեցող իրադարձություններից, և այլն»։
Փաշինյանը նշեց, որ իշխանությունը որդեգրել է խաղաղության օրակարգ ու ռազմավարություն և անում է հնարավորն՝ այն կյանքի կոչելու համար։ Նա հիշեցրել է, որ նախորդ շաբաթ Մոսկվայում տեղի է ունեցել Հայաստան-Ադրբեջան-Ռուսաստան եռակողմ ձևաչափով բանակցային հերթական փուլը։
Վարչապետը որոշ մանրամասներ է բացահայտել.
«Տեղեկացնեմ, որ քննարկման թեմաներից մեկը վերաբերում էր ԼՂ-ում հաստատված հումանիտար իրավիճակին և Լաչինի միջանցքի ապօրինի փակմանը։ Այս թեման քննարկել ենք նաև ՌԴ մեր գործընկերների հետ, և չեմ կարող ասել, որ արդյունքները գոհացնում են։ Պետք է արձանագրենք, որ սա շատ ցավալի իրավիճակ է»,- ասել է նա։Փաշինյանը հիշեցրել է, որ առիթ ունեցել է ասելու, որ Լաչինի միջանցքի փակումը տեղի է ունեցել ռուս խաղաղապահների աչքի առաջ և ներկայությամբ, ինչը ևս մտահոգիչ է. «Այս իրադրության կարգավորման ուղղությամբ մենք շարունակելու ենք քննարկումները, այդ թվում՝ ռուսաստանցի գործընկերների հետ»։
Նա պատմել է, որ Մոսկվայում քննարկվել է նաև տարածաշրջանային կոմունիկացիաների բացման հարցը։ Ըստ վարչապետի՝ Հայաստանը պատրաստ է դրան, բայց դա պետք է տեղի ունենա 2020թ. նոյեմբերի 9-ի հայտարարության հիման վրա. «Մենք ընդգծել ենք, որ երկրների սուվերենության և իրավազորության ներքո պատրաստ ենք շատ արագ կոմունիկացիաների վերաբացմանը։
Փորձում ենք աշխատել երկաթուղային ենթակառուցվածքների բացման վրա։ Մենք տրամադրված ենք ու շահագրգիռ, որ տարածաշրջանային կոմունիկացիաները բացվեն»։
Փաշինյանը նշել է, որ Հայաստանն այս հարցում մեծ ճկունություն է ցուցաբերում. «Իմ ասած սկզբունքը տարածաշրջանի երկրների սուվերենության և իրավազորության ներքո կոմունիկացիաների բացման մասին է, և կարծում եմ՝ մենք այդտեղ բավական ճկուն և կառուցողական դիրքորոշում ունենք, պատրաստ ենք իսկապես գնալ այդ կոմունիկացիաների բացմանը»։
Նա շեշտել է, որ այդ հարցի լուծումը միայն Հայաստանից չի կախված։
