Այսօր՝ ԱԺ պաշտպանության և անվտանգության հարցերի մշտական հանձնաժողովի նիստի ժամանակ, ՀՀ պաշտպանության նախարար Սուրեն Պապիկյանը ներկայացրեց օրենսդրական փոփոխություն, որի միջոցով ՀՀ-ում իգական սեռի քաղաքացիները կարող են կամավոր կերպով անցնել պարտադիր զինվորական ծառայություն։
Այն 6 ամսով է։ Զորակոչված կանայք, առանց վիճակահանության, ծառայության են նշանակվում ուսումնական զորամասում։«6 ամսվա ծառայությունից հետո նրանք հաշվառվում են և ենթակա են հետագա վարժական հավաքներին կամ մոբիլիզացիաներին մասնակցելու։ Նրանք պահեստազոր են, ինչպես բոլոր տղամարդիկ։ Անհրաժեշտության դեպքում կարող են զորակոչվել»,- մանրամասնեց նախարարը։
Պատգամավոր Գեղամ Մանուկյանը հարց ուղղեց Պապիկյանին՝ ասելով՝ ուսումնական զորամասերից որևէ մեկում շինարարական կամ այլ աշխատանքներ իրականցվո՞ւմ են, նախարարը պատասխանեց․ «Աշխատանքներն արդեն սկսվել են, նախորոշված է այն զորամասի տարածքը, որին կցված է լինելու կանանց վաշտը։ Այդ գումարտակի ծառայողները հանդիսանալու են ուսումնական գումարտակի վարչակազմ»։
Մանուկյանի հաջորդ հարցին՝ եթե կին զինծառայողը 6 ամսվա ծառայության ընթացքում առողջական խնդիրների պատճառով զորացրվելու է, բայց շարունակելու է պատվովճար ստանալ, ապա ի՞նչ է լինելու այն կին ծառայողների հետ, որոնք ամուսնացած են և ամսվա ընթացքում իրենց տրամադրվող արձակուրդի ընթացքում հղիացել են, պաշտպանական գերատեսչության ղեկավարը և հանձնաժողովի նախագահ Անդրանիկ Քոչարյանը նշեցին. «Կողջունենք, եթե այդպիսի ուրախալի դեպքեր լինեն։ Եթե շատ լինեն, ավելի շատ կողջունենք»։
ՀՀ իգական սեռի քաղաքացիները, որոնց տարիքային շեմը 18-27 տարեկան է, կամավոր կերպով կարող են անցնել 6 ամսվա ծառայության։ Դրա համար պետք է դիմում ներկայացնեն մոտակա զինկոմիսարիատ, անցնեն ստանդարտ գործընթացներով։ Մինչև այն օրը, երբ նորակոչիկ կինը պետք է զորակոչվի, կարող է հետ կանգնել կայացրած որոշումից և ազատվել ծառայությունից, սակայն ծառայության անցնելուց հետո այդ 6 ամիսը նրա համար դառնում է պարտադիր։
«Կարևոր է, որ ՀՀ-ի իգական քաղաքացիներն իրենց զգան լիիրավ անդամներ, այդ թվում՝ նաև հայրենիքը պաշտպանելիս։ Կարծում եմ, որ կանայք ավելի ուժեղ են, քան այս մասով ձևավորված է կարծիք։ Մենք նախաձեռնել ենք, որ կանայք մասնակցեն պատրաստության մեկօրյա կամ եռօրյա տևողությամբ։ Ես անձամբ այդ ընթացքում շփվել եմ նրանց հետ, մեծամասնության մոտ մեկ հարց էր՝ ինչու իրենք էլ չեն կարող մասնակցել հավաքներին։ Հիմա տալիս ենք այդ հնարավորությունը»,- ասաց Պապիկյանը:
