«Եթե Բաքու-Ստեփանակերտ ուղիղ երկխոսություն տեղի չունենա, խնդիրը, նույնիսկ Ադրբեջանի տեսակետից, չի լուծվելու։ Այլ տարբերակը ցեղասպանությունն է», – այսօր լրագրողների հետ ճեպազրույցում հայտարարեց ԱԺ նախագահ Ալեն Սիմոնյանը՝ պատասխանելով հարցին, թե արդյոք խաղաղության պայմանագիր կստորագրվի, եթե Ադրբեջանը հետ քաշի զորքը Հայաստանից գրավված տարածքներից կամ հաստատվի Բաքու-Ստեփանակերտ ուղիղ երկխոսություն։
Սիմոնյանը վստահեցրեց, որ ցեղասպանություն թույլ չեն տա։ Նրա խոսքով՝ ադրբեջանական իշխանությունները պետք է մտածեն, որ ուղիղ երկխոսության հարցը իրենց համար շատ ավելի կարևոր է, քան՝ մեզ։
Անդրադառնալով գրավյալ տարածքների վերաբերյալ հարցին՝ ԱԺ նախագահն ասաց. «Կան գյուղեր, տարածքներ, որոնք հայկական վերահսկողության տակ են․ դրա մասին, բնականաբար, չենք խոսում։ Կան նաև Հայաստանի տարածքից մասեր, որոնք գրավյալ տարածքներ են․ եթե չեմ սխալվում, մոտ 150 կմ²։ Բնական է՝ պետք է տեղի ունենա զորքերի ետքաշում։
Այնտեղից, որը դեմարկացիա/դելիմիտացիայից հետո կլինի Հայաստանի տարածքում, ադրբեջանական զորքերը պետք է դուրս գան (և դուրս կգան), այնտեղից, որն Ադրբեջանի տարածքից է, բնական է, հայկական զորքերը դուրս կգան»,- ասաց Սիմոնյանը՝ նշելով, որ Հայաստանի համար այդ երկու կետը սկզբունքային է․
«Եթե դրանք չլինեին, կարելի էր ասել, որ խաղաղության պայմանագրում տեխնիկական հարցեր են մնացել»։
