ՀՀ երրորդ նախագահ Սերժ Սարգսանի թիկնազորի նախկին պետ Վաչագան Ղազարյանը կալանավորվել է։ Այս մասին Radar Armenia-ի գրավոր հարցմանն ի պատասխան հայտնեցին ՀՀ գլխավոր դատախազությունից։
«2005- 2010 թվականների ընթացքում ՀՀ պաշտպանության նախարարության պաշտոնատար անձանց կողմից իրենց պաշտոնեական լիազորությունները չարաշահելու, լիազորությունների շրջանակից ակնհայտորեն դուրս եկող դիտավորությամբ գործողություններ և պաշտոնեական դիրքն օգտագործելով առանձնապես խոշոր չափերով վատնում կատարելու, ինչպես նաև պաշտոնատար և այլ անձանց կողմից առանձնապես խոշոր չափերով փողերի լվացում և դրանց օժանդակություն կատարելու առերևույթ դեպքերի առթիվ ՀՀ ազգային անվտանգության քննչական գլխավոր վարչությունում քննվող քրեական վարույթով 2023 թվականի մայիսի 26-ին Վաչագան Ալեքսանդրի Ղազարյանին մեղադրանք է ներկայացվել 2 դրվագ 2003 թվականի ապրիլի 18-ին ընդունված ՀՀ քրեական օրենսգրքի 190-րդ հոդվածի 3-րդ մասի 1-ին և 3-րդ կետերով (պաշտոնեական դիրքն օգտագործելով առանձնապես խոշոր չափերով փողերի լվացում) և 38-309-րդ հոդվածի 3-րդ մասով (պաշտոնեական լիազորություններն անցնելու դրդչություն, որն անզգուշությամբ առաջացրել է ծանր հետևանքներ):
2023 թվականի մայիսի 27-ին Երևան քաղաքի առաջին ատյանի ընդհանուր իրավասության դատարանի որոշմամբ մեղադրյալ Վաչագան Ղազարյանի նկատմամբ որպես խափանման միջոց ընտրվել է կալանքը: Քրեական վարույթով նախաքննությունը շարունակվում է»,- ասված է հարցման պատասխանում։
Հայկ Մագոյան
