««Ստամբուլյան կոնվենցիա»-ի հետ կապված, կարծում եմ, մեր հասարակությունում անհրաժեշտ է բովանդակային քննարկում՝ ապատեղեկատվության այդ շղարշը հանած: Մեզ անհրաժեշտ է հասկանալ, թե ինչ գործիքներ է տալիս «Ստամբուլյան կոնվենցիան» ընդհանրապես, և ինչ նպատակի է այն ուղղված»:
Այս մասին այսօր լրագրողների հետ զրույցում ասաց ՀՀ ՄԻՊ Անահիտ Մանասյանը:
«Առաջնահերթ մի բան նշեմ, որ ընտանիքում բռնության կանխարգելումը առաջնահերթ նշանակություն պետք է ունենա ցանկացած հասարակության համար և նաև Հայաստանի Հանրապետության համար: Հետևաբար կարևոր եմ համարում, որ ունենանք պատշաճ մեխանիզմներ այս առումով, կլինի դա «Ստամբուլյան կոնվենցիան», թե մեր ներպետական օրենսդրությունը, դա չէ ամենակարևորը, ամենակարևորն այն է, որ ունենաք պատշաճ գործիքներ»,- նշեց Մանասյանը:
ՄԻՊ-ը նկատեց, որ շատ դեպքերում թե՛ «Ստամբուլյան կոնվենցիա»-ի, թե՛ ընդհանրապես ընտանեկան բռնության կանխարգելմանը վերաբերելի հացերում ստանում են ձևախեղված, ոչ պատշաճ տեղեկատվություն. «Ինչի արդյունքում սկսում ենք քննարկել ոչ թե բովանդակային հարցերը, այլ ֆորմալ և ապատեղեկատվության շրջանակներում ընդգրկված հարցերը, ինչը ճիշտ չէ»:
Անահիտ Մանասյանը շեշտադրեց, որ մենք պետք է շատ բովանդակային քննարկումներ ունենանք ընտանեկան բռնության կանխարգելմանը վերաբերելի հարցերի շուրջ:
