«Թե՛ մեր կողմը, թե՛ ադրբեջանական կողմն ամեն ինչ անում է, որ այլ կարծիքների, այլ մեկնաբանությունների տեղիք չթողնի»:

Այս մասին այսօր Ազգային ժողովում՝ լրագրողների հետ ճեպազրույցի ժամանակ, ասաց ԱԺ նախագահ Ալեն Սիմոնյանը՝ անդրադառնալով խաղաղության պայմանագրի շուրջ բանակցություններին:

«Քանի որ Նոյեմբերի 9-ի հայտարարության դեպքում նման բաների հաճախ ենք հանդիպում, օրինակ՝ ադրբեջանական կողմը փորձում է այլ կերպ մեկնաբանել, հայկական կողմը՝ այլ, բայց իրականությունը մեկն է»,- նշեց նա:

Հարցին՝ հնարավոր համարո՞ւմ է, որ Էրդողանի այցից հետո Ադրբեջանը կոշտացնի իր դիրքորոշումը, Ալեն Սիմոնյանն արձագանքեց. «Կոշտացնելը հո դրանով չի պայմանավորված, պայմանավորված է մեր դիրքից, մեր ասելիքից, մեր միջազգային գործընկերների հետ համագործակցությամբ:

Ես պետք է նորից օրինակ բերեմ. այդ միջանցքի մասին խոսակցություններին, տեսաք, հայկական կողմը դրսևորեց իր կամքը և մինչև վերջ ասաց, որ նման բան չի լինելու, և կարծես թե այդ ընկալումը եղավ, որ, իրոք, այդ մասին չի խոսվել, ոչ էլ՝ նախատեսվել: Չնայած որոշները փորձեցին սակարկել ու ասել, թե ինչ-որ բան է խոստացել պարոն Փաշինյանը: ՌԴ նախագահը դրա մասին խոսեց, նաև տեսնում ենք, որ կարծես ադրբեջանական հռետորաբանությունից էլ է դուրս եկել: Կարող եք այս ամենը նույն ձևով պրոյեկտել բանակցությունների գործընթացի վրա»: