ԱԺ նախագահ Ալեն Սիմոնյանը հայտարարել է, թե Հայաստանի իշխանությունները պատրաստ են կարգավորել հայ-թուրքական հարաբերությունները։ Ըստ նրա, իշխանությունները դրան պատրաստ են, նույնիսկ մեծ քննադատությունների միջով անցնել, եթե Թուրքիայի կողմից կամք կա այդ հարաբերությունները կարգավորելու։ «Թուրքական կողմը, ցանկություն ունենալու պարագայում, կարող է անընդհատ պատճառներ բերել։ Կարող է «Նեմեսիս»-ի արձանը չլինի, ուրիշ բան լինի։ Ես ինքս «Նեմեսիս»-ի արձանի տեղադրումը սխալ եմ համարում, որովհետև դա պետական քաղաքականության գիծ չէ ու չի կարող լինել, բայց նորից եմ ասում, որ դա ընդամենը առիթ էր Թուրքիայի համար։ Ես ինքս հայտարարել եմ՝ Թուրքիա չգնալու համար կարող էի 1 միլիոն պատճառ գտնել ու չգնալ։
Եթե Թուրքիայի կողմից կամքը կա, իսկ ես տպավորություն ունեմ, որ կա, ապա հարաբերությունները կարգավորելու պատմական ու եզակի հնարավորություն կա, մենք դրան պատրաստ ենք, պատրաստ ենք նույնիսկ անցնել մեծ քննադատությունների միջով, բայց երկարատև խաղաղություն բերել հայ ժողովրդին»,- նշել է նա։ Ալեն Սիմոնյանի խոսքով, Էրդողանի երդմնակալությանը մասնակցելու համար վարչապետ Նիկոլ Փաշինյանի այցը Թուրքիա բավականին լավ է անցել, և վարչապետը եղել է ուշադրության կենտրոնում. «Այցը, կարելի է ասել, գլխավոր իրադարձություններից մեկն է եղել»։
