ԱԺ ՔՊ խմբակցության պատգամավոր Վիգեն Խաչատրյանը ՄՊՀ անդամի թեկնածուի ընտրության վերաբերյալ ելույթում նշել է, որ մինչև 2018թ. Հայաստանում այլասերված մթնոլորտ էր բոլոր ոլորտներում․ «2018թ. այդ թվում նաև Դուք մասնակցեցիք այդ երևույթների մերժմանը, հետո մեզ մոտ սկսվեցին տարաձայնություններ»,- ասաց նա։ Ըստ Խաչատրյանի՝ կարելի է չհամաձայնվել, վիճել, բայց՝ ելքերի վերաբերյալ։
«Չեմ ասում՝ հրեշտակներ են իջել, իշխանության չարաշահում չկա, բայց մթնոլորտ է փոխվում ամեն օր։ Մեր ուզած չափով չէ, մեր ուզած ձևով չէ, բայց փոխվում է»,- ասաց Խաչատրյանը։
Դիմելով ընդդիմությանը՝ նա ասաց, թե բացի մաղձից ու ատելության խոսքից՝ ոչինչ չունեն. «Կար մեկը, ոչ բարով կուսակցություն էր ստեղծել, հեռացավ, գնաց։ Առաջին օրով հայտարարեց՝ գնում եմ ԱԺ, այնտեղ իմ թշնամիներն են։ Ես ձեզ թշնամի չեմ համարում»,- նշեց Խաչատրյանը՝ հավելելով, որ չի կարող համակերպվել այն մտքի հետ, որ ոմանք երկիրն ուզում են տանել այնտեղ, որտեղից դուրս է եկել։
